Continuing Nursing Education buatsaih

RIPANS-a College of Nursing chuan nimin khan Continuing Nursing Education' an buatsaih a, Higher & Technical Education minister Dr Vanlalthlana'n a hmanpui a, sorkar laipuia Nursing adviser Dr Deepika Cecil Khakha leh assistant director general Achala ten an tel.

'Continuing Nursing Education' hi RIPANS College of Nursing-a M.Sc. zirlai, Mizorama M.Sc. (Nursing) zir chhuak hmasa ber turte puala buatsaih a ni a, thupui chu 'Leading with vision: Strategies for effective leadership in nursing' tih hman a ni.

Inkhawm hi RIPANS College of Nursing Principal-in a kaihruai a; khuallian HTE minister Dr Vanlalthlana chuan, nurse-te chu mipui hriselna atana mi pawimawh tak an nih avangin hruaitu ṭha an nih a tul thu a sawi a, "Damlote hamṭhatna atana hmakhua thlir thiam a, tum mumal tak neia kaihhruai a ṭul. Thawhhona ṭha tak neih a nih theih nan inhriatthiam tawnna a pawimawh," a ti.

RIPANS hi kum 1996-ah din ṭan niin, Mizorama nursing-a B.Sc leh M.Sc. zirna hmasa ber a ni a; nursing bakah pharmacy, medical laboratory science, radiology & imaging leh optometry-ahte graduate leh post graduate course a awm.

RIPANS hi Ministry of Health & Family Welfare hnuaia din a nih angin hmarchhak state pariat leh Jammu & Kashmir aṭangin zirlai 865 an awm mek a, Nursing bikah hian batch 24 awm tawhin, zirlai 740 an chhuak tawh a ni.

Sorkar laipuia Ministry of Health and Family Welfare hnuaiah RIPANS Hospital tur sak mek a ni a, khum 100 awmna tura ruahman a ni.