Sorkar chungah AMCECC lawm

All Mizoram CSS Employees Coordination Commitee (AMCECC) chuan thuchhuah siamin, hun rei tak chhung an lo nghah tawh leh sorkara an lo beisei tawh, CSS Special Regularisation Scheme chu June 6, 2024 khan Council of Ministers ṭhukhawmin a pawm ta chu an lawm thu an tarlang.

AMCECC chuan, "Sorkarin ruahmanna ṭha tak siam a, CSS hnuaia thawkte hamṭhatna tur dan pawimawh tak a siam ta hi lawmawm kan ti hle. He scheme hlawhtlinna tura thâ thawhtu officer, MLA leh minister zawng zawng te, a bik takin chief minister Pu Lalduhoma hnenah thinlung takin lawmthu kan sawi a ni," an ti.

CSS Special Regularisation Scheme chu a rang thei ang bera hman a nih theih nan chak taka hma la zui turin sorkar an beisei thu an tarlang bawk.