STAM Proficiency Award sem a ni

Science Teachers' Association, Mizoram (STAM) chuan June 6, Ningani khan Synod Conference Centre-ah zirlai ti ṭhate chawi­mawina hun an hmang a; kumin HSLC leh HSSLC-a science leh mathematics subject-a mark hmu sang berte hnenah STAM Proficiency Award an hlan.

STAM Proficiency Award hi kum 2017-ah sem ṭan a ni a, science leh mathematics lama mi chhuanawm leh hming­ṭhate hming chawia sem a ni ṭhin. Kumina award dawngtute hnenah Rs 10,000 bakah, memento, STAM Dictionary leh thuchei an pe a ni.

Chawimawina hlan inkhawmah hian khual­lian Prof. Lalnun­danga, Mizoram Univer­sity registrar-in thu a sawi a, zirna sang zawkah hriat zui tlak ni zel tura theih­­tawp chhuah tur te, an thiamna leh finnate hmanga mi dang tana malsawmna ni tur leh an hmathlirte tihlawhtling tura inbuatsaih turin award dawngtute a chah.

Award thawhtu C Lalrosanga, Prof. Zaithan­zauva Pachuau, Prof. Rualkhuma Colney, ZET leh Dr R Kapṭhuama chhungte'n thu an sawi bawk.