AMC by-election-a BJP candidate tur K Vanlalruati

BJP, Mizoram Pradesh president Vanlalhmuaka chuan nimin khan June 25, 2024-a Aizawl Municipal Corporation (AMC) Ward-XIX by-election neih tura an candidate tur chu K Vanlalruati d/o P Liankhama, Tlangnuam Vengthar a nih thu a puang.

Nimina BJP pisaa candi­date puanna inkhawm­ah Vanlalhmuaka chuan, AMC Ward XIX by-election-ah an candidate thlan tlin a nih chuan central minister-te'n an rawn tlawh ṭhin dawn niin a sawi a, "Kan candidate hi AMC Ward-XIX mipuite'n party thliar loin, an tana thawh hlâwk ber thei tur a ni tih hriaa min lo vote sak turin kan sáwm tak meuh a ni," a ti.

BJP candidate K Vanlalruati hi zirnaah BA (English) a ni a, mimal leh kohhran sikulahte a thawk tawh ṭhin a ni. Tunah hian Aizawl district BJP vice president a ni mek.

AMC Ward-XIX hian Kulikawn, Tlangnuam, Tlangnuam Vengthar, Saikhamakawn, Melthum leh Hlimente a huam a; AMC term kal mekah hmeichhe bial niin, kum 2021 inthlanpuia thlan tlin Baryl Vanneihsangi chuan MLA a nih tawh avangin a chhuahsan a, by-election neih a ngai a ni.

BJP bakah hian, ZPM, MNF leh Congress party-te'n an candidate tur an puang a, nimin chawhnu dar 3 kha candidate-te tana nomination thehluh hun tàwp a ni.