Mipate'n hmeichhiate kan khûm!

Tun hma chuan a tlangpui thuin Mizo mipate hi ṭawng tam vak lo, phunchiar lo leh mi rêl ngai vak loa sawi kan ni ṭhin a; hmeichhiate hi phunchiar zawk leh mi rêl chîng zawka ngaih leh sawi an ni ṭhin. Mahse, hemi chungchangah hian tunah chuan Mizo mipate'n kan hmeichhiate hi kan khûm ta niin a lang - a bikin social media-ah.

Tun hma deuh chuan Mizo mipa, mi rêl chîng deuh leh phunchiar deuh chu hmeichhe tih âwm tâwk lek tia ngaih an ni ṭhin a. 'Hmeichhia nghal loh...' tih te, 'Hmeichhia ang mai' tih ṭawngkamte a awm ṭhin a. 'Hmeichhia pathum an ti ti khawm tawh chuan mi rêl an nei ngei ngei' tih ṭawngkamte pawh sawi a ni ṭhin bawk. Heng aṭang hian hmeichhiate an phunchiar zawk a, mi rêl an chîng zawk ṭhin ni ngeiin a lang.

Khawvel a danglam chho hret hret a, thil thar, ngaihdan thar, chîn dan thar a awm chho zel. Social media pawh kan hmang nasa ta. Mizo mipa zia pawh a danglam chho ta viau mai bawk. Tunah chuan Mizo mipate'n mi rêl leh phunchiarah kan hmeichhiate kan khûm ta!

Social media-a thu dah (post) leh mi dangin an sawi zuina (comment)-te hi in en ve ṭhinin ka ring a. Group hrang hrangah hian hmeichhia aiin mipa an ṭawng tam zawk tih in hmu thei ang. Mizo mipate'n hmeichhiate aiin mi chhiatna lai sawi an chîng zawk a, thu dik tawk lo leh thu dik tluantling lo post/comment an chîng zawk.

Tun hmaa hmeichhe sawi âwm tâwk leka an ngaih thil tam tak chu tunah chuan hmeichhiate aiin mipain an sawi peih tawh zawk a, mipa an phunchiar tawh zawk a, mi rêl (mi chanchin sawi) an ching tawh zawk tihte social media-ah in hmu ṭhin bawkin a rinawm.

Mizo mipate kan phunchiar tak zawkna leh mi rêl kan chîn tak zawkna hmun lah hi a darh zau chi a ni leh zel a. Hmeichhiate'n mi an rêl tamna hmun chu titinaah a ni a, hretu an tam lo, a thleng thui lo. Mipate phunchiarna leh mi an rêl ṭhinna hmun erawh social media a nih miau avangin a darh zau a, a thleng thui a, Mizoram pawn thlengin a darh ṭhin. Chuvangin, mipate'n ze ṭha lo kan lan chhuahtirna hmun hi a mualphothlak lehzual.

Mipa an ni emaw, hmeichhia an ni emaw, ṭawng tam, phunchiar leh mi rêl chîng deuhte hi an ngeiawm ṭhin a, an chimawm bawk ṭhin. Hetiang mite hian mi ngei an hlawh duh nge nge a, miin an kâwm ṭha peih lo tlangpui - kan hriat tlan vek kha.

Mizo mipate'n kan hmeichhiate kan khûmna hi a mawi lo riau. Insûm ila, phunchiar lutuk lo ila, mi rêl zet zet lo ila; kan ze ṭha ṭhinah kha i kîr leh teh ang u. A ṭha lam kawng tam taka Mizo hmeichhiate'n Mizo mipate min khûm meknaah hian khûm lêt leh turin ṭan i la thar zawk ang u khai.

- Zoramchhana