Vanglaini - Minister-in cold storage a tlawh

KHAWTHLIR

PUC-in zirlai thlah

Pachhunga University College (PUC) chuan an college-a master degree (M.A leh M.Sc.) zirlai chhuak hmasa berte thlahna inkhawm nimin khan an college-ah an buatsaih. PUC-ah hian kum 2018 khan post graduate zirna hawn a ni a, bul ṭan nan Mizo, Philosophy leh life sciences-ahte master degree hawn a ni. Kumin aṭangin Geophysics hawn ṭan an tum a; subject an neihahte hian admission hawn mek a ni.

MTC pass vek

Senate of Serampore College (University)-in October 15, 2020-a result a tihchhuahah Missionary Training College (MTC), Aizawla Bachelor of Missiology (B.Miss) final year zirlai mi 15-te an pass vek. First division (A-)-ah pakhat, second division (B+)-ah mi 12 leh second division (B)-ah mi pahnih an pass a ni.

Thisen pe

ṬKP, Kanan Unit, Aizawl chuan nimin khan Aizawl Civil Hospital tan thisen unit 21 an pe a, a petute mipa 20 leh hmeichhia pakhat an ni. Police Security unit pawhin Police Commemoration Day pualin ACH blood bank-ah unit 16 an pe bawk.

Darlawn PHC tlawh

Health secretary H Lalengmawia chuan nimin khan Darlawn PHC (damdawi-in) sak mek a tlawh.

MP-in CEC kâwm

Lok Sabha MP C Lalrosanga chuan nimin khan chief election commisisoner (CEC) Sunil Arora leh election commissioner Sushil Chandra-te an pisaah a kâwm a, Delimitation Commission hmalakna leh Mizorama inthlanpui buatsaih dante a sawipui. Sunil Arora chuan, Mizorama inthlanpui buatsaih dan chu fel leh ṭha a tih thu C Lalrosanga a hrilh.

Lungphum phum

Assembly speaker Lalrinliana Sailo chuan nimin khan a bial Suangpuilawnah damdawi-in (PHC) sak ṭhat hna bul ṭanna tur lungphùm a phúm. Lalrinliana Sailo chuan, PHC chu a theih anga ranga sak a nih tur thu sawiin, "He damdawi-in hi pantu an tam avangin a thawktu ang zawng pawhin tihphuisui dan a ṭul angin ngaihtuah a ni ang," a ti. Suangpuilawn PHC hi dispensary anga ṭan a ni a, kum 2000-ah PHC-ah hlankai a ni.

DAWNTISEI

Minister-in cold storage a tlawh

Agriculture minister C Lalrinsanga chuan nimin khan APEDA Pack House cum Cold Storage, Tuirial a tlawh a, an hmunhmate a enfiah.

C Lalrinsanga chuan, Pack House cum Cold Storage hman dan (operational plan) leh enkawl dan tur (maintainance) duan chu tih hmasak ber tur a nih thu sawiin, "Loneitute dinhmun hriatthiampuia ngaihtuahna sen a ngai. Loneitute tan malsawm dawnna a nih ngei ka beisei," a ti.

APEDA Pack House hi kum 2016-a buatsaih tan, sorkar laipui hnuaia Agricultural and Processed Food Products Export Development Authority (APEDA) bultuma din tur a ni a; project atan cheng vbc. 12 sèn a ni dawn.

Share this Post

Login to comment

No Comments