Nimina Serchhipah Rapid Antigen Test hmangin Covid-19 vei hmeichhe pakhat hmuh chhuah ni mah se, chî-âi lo turin sorkar thuchhuah chuan mipui a chah a, "Mipui tirálkhèl thei thu eng mah thehdarh lo turin mi tin kan inngen a, mipui tan chî-àina tur a awm lo tih kan inhriattir e," a ti.

Sorkar thuchhuah tarlan danin, Serchhipa nimina Covid-19 positive hmuh chhuah hi Assam Rifles nupui kum 35 mi a ni a, a damsam loh avangin inentir turin Serchhip District Hospital OPD-ah a kal a ni. Hming ziah hun nghâka Dental OPD kawta a ṭhut laiin Sample Collection Team-in zirlaite tana RAT an tih lai a nih vang leh amah chu sipai chhungkuaa mi a nih avangin fimkhur thilah RAT hmangin endik a ni.

IPR department thuchhuah chuan, hripui vei sipai nupui chu OPD main building chhungah a lut hman lo a, a hming pawh a ziak hman lo tih tarlangin, "Chhiahtlang CCC-ah dah nghal a ni a, a chênpuite pawh RAT tih ve nghal niin, anni chu an negative thung. Dental OPD tual pawh uluk takin vawi hnih sanitise a ni a, a bul hnaia ṭhute chu inkhung hrang tura tih nghal an ni," a ti.

Share this Post