Maldives-in Israel mi an rama luh phal tawh dawn lo

Muslim tamna ram, Maldives chuan Gaza Strip-a indona thleng mek an duh loh zia lantirna atan, Israel mi leh sate chuan an ram luh theihna passport nei mah se luh an phal tawh dawn lo tih a puang.

Maldives president Mohamed Muizzu chuan Israel passport in an ram luh theih nan awmzia a nei tawh dawn lo tih a puang a, mahse engtik hun aṭangin nge he thil hi an kalpui dawn tih erawh an sawichiang lo thung. Maldives hian Israel-Palestinian inkara buaina thleng mek karah Palestinian lamin puihna an dil chungchang ngaihtuah turin special envoy a ruat dawn. Palestinian mite pual hian UNRWA nena thawk dunin sum tuak an tum a, hei bakah ram pum huapin "Maldivians with Palestine" rally huaihawt an tum bawk.

Kum 2023 khan Maldives-ah hian Israel mi 11,000 chuang an zin a, hei hi Maldives-a khualzin lut zawng zawng aṭangin 0.6% chauh a ni thung. Kumin kumtir lam thla li chhunga Israel mi, Maldives rama zin hi mi 528 chauh an awm a, nikum hemi hunchhungah hian mi 4,644 an awm thung.

Israel mite Maldives aiah Lakshadweep tlawh zawk turin chah

Maldives-in an rama Israel mi luh an phal tawh dawn lo tih an puan hnuah Israel foreign ministry thupuangtu chuan Maldives-a Israel khualzin awm mekte chu a rang lama Maldives chhuahsan turin a chah ve nghal a, Israel mite chuan harsatna an tawk a nih chuan an tan buaipui a harsa dawn tih an tarlang.

India-a Israel embassy chuan post siam ve nghalin, Israel mite chu Maldives ram aiah India rama hmun nuam tak, Lakshadweep chu tlawh zawk turin a chah. 'Maldives ramin Israel mite a lo lawm tawh loh chuan, Indian ramah beach mawi leh nuam tak, Israel mite ṭha taka an lo dawnsawnna hmun a awm a ni," tiin Lakshadweep, Andaman and Nicobar Islands, Goa leh Kerala-a beach thlalakte an dah tel.

Israel passport neite hi Maldives bakah ram hrang hrang Algeria, Bangladesh, Brunei, Iran, Iraq, Kuwait, Lebanon, Libya, Pakistan, Saudi Arabia, Syria leh Yemen-ahte pawm an ni lo bawk.

A hmain Maldives hian Israel khualzinte luh khapna hi lo siam tawhin, kum 1990 tir lam khan a khapna hi a hlip a, 2010-ah Israel nen inlaichinna ṭha siam tumin hma a la chho a ni. Mahse kum 2012-a an ram president aṭanga Mohamamd Nasheed paihthlak a ni tak hnu khan, Israel nena an inkar siamṭhat tuma an hmalakna hi a khaihlak zui leh ta a ni.