Rajya Sabha MP K Vanlalvena chuan October 15, Ningani tlai khan Defence minister Rajnath Singh chu a chenna inah a kâwm a; Defence Ministry emaw Home Ministry emaw hnuaiah Mizo Regiment emaw, Mizo Rifles emaw din turin a ngen.

K Vanlalvena chuan, Mizote chu pi leh pu hun aṭang tawha hnam huaisen leh indo mi an nih thu sawiin, "British sorkarin India, Bangladesh leh Pakistan-te awp turin silai vawi khat pawh a hmeh puah loh laiin, Mizote awp tur erawh chuan British sipai leh officer-te'n nunna an chán a ni. Mizo leh Bristish-te chu hun rei tak indoin, Mizo lal pahnih Dokulha Chinzah leh Ropuiliani te phei chu an thih ní thlengin British-in lung-inah an khung a ni," a ti.

Mizo tlangval tam takin sipaia ṭan chu an duh ber a nih avangin Assam Regiment leh Assam Rifles-ah pawh Mizo tlangval tam tak an awm mek thu sawiin Vanlalvena chuan, tuna ṭang mek aia tam zawk daih sipaia ṭang duh Mizo ṭhalai an awm tih a sawi a, "Mizo Regiment/Rifles din a nih chuan India-in regiment a neih tawh zawng zawnga huaisen leh discipline ṭha ber an nih theih ka ring," a ti a; Mizoram chu international boundary km. 720-a thuiin a hual avangin Mizo Regiment/Rifles din a ṭul thu a sawi.

Rajnath Singh pawhin Mizoram MP thu thlen chu thil pawimawh tak a nih thu leh uluk taka ngaihtuahna hmang chunga an lo en zui tur thu a lo hrilh tih, sorkar thuchhuah chuan a tarlang.

Share this Post