PNG-in Windies an chhaih buai

T20 World Cup thlengtu West Indies-in match hmasa berah Papua New Guinea an hmachhawn a, awlsam taka chak tura ngaih ni mah se chak lo thei dinhmunah an ding. Guyana-a inkhelah Windies hian chak turin ball 19 aṭangin 37 runs siam an mamawh a, Roston Chase chet ṭhat zarah ball ruk dah bangin hnehna an chang.

Providence Stadium-a inkhelah Windies hi ṭhumvawrah an vannei a, vawm hmasak an thlang. Papua New Guinea-in vawi hnih champion tawh West Indies lakah 136/8 runs chauh an siam thei a, chutihrualin Sese Bau-a'n ball 43 aṭangin half century (50) a vaw chhuak.

Windies tan hna harsa tur awmin lang lo mah se Johnson Charles-a'n run a siam lo a, ball khat chauh a hmachhawn. Over 16-ah Windies hian 97/5 runs chauh an la siam a, vanduai ve thei an ni.

Mahse, Andre Russel leh Roston Chase te a hunah tak an rawn che ṭha. Chase hian four vawi li leh six vawi hnih a vaw chhuak a, Windies-in over 19-ah 137/5 runs siamin wicket ngain an chak. Over tawp lamah Chase rawn che ṭha lo se West Indies hi mualpho ve thei an ni.

Zanin dar 8:00 hian champion lai England leh Scotland te an inkhel dawn. England hian World Cup hmain inelna hnuhnung ber final-a an hneh Pakistan nen T20 series an khel a, 2-0 in an hnehna an chang.

Three Lions hian Phil Salt, Jos Buttler, Will Jacks leh Jonny Bairstow te an kawl a, batting line up a ṭha thawkhat hle. Bowling lamah Jofra Archer, Mark Wood leh Adil Rashid te an awm bawk nen, Scotland lakah England hi chak ngei tura ngaih an ni.