Euro 2024 : Ronaldo telna Portugal an champion thei ang em?

2024 UEFA European Football Championship chu June 14 - July 14, 2024 inkar hian Germany-ah khelh a ni dawn. Europe khawmualpui tana football inelna lian ber hi Germany khawpui 10-ah ram 24-in an khel ang.

European footballer zinga ropui bera chhal ngam Cristiano Ronaldo-a'n football khelh a la chawlhsan lo a, tun ṭum inelnaah hian a la tel dawn avangin Al Nassr forward hi hming langsar ber zinga mi a ni. Kum 2016 khan Ronaldo hoin Portugal hi an champion tawh a, kuminah champion nawn leh an tum dawn a ni.

Portugal hi group F-ah Czech Republic, Turkey leh Georgia te nen an awm a, last 16 luh hi thil harsa tur niin a lang lo. Chutihrualin Euro C'ship chinah chuan eng result pawh thleng thei a ni a, champion thei zinga mi Portugal meuh pawh hi tla nghal thei an ni ve tho bawk.

Ronaldo telna chu

Portugal hian manager Roberto Martínez hnuaiah inelna lian tham an hmachhawn dawn a, Spanish manager hian Ronaldo a kawl miau avangin a hna a hautak dawn. Everton manager Martinez hian kawng hrang hrangin 'pressure' a nei dawn a, a thlak tak Carlos Santos pawh khan World Cup 2022 quarterfinal-ah bench-ah Ronaldo a dah a, Morocco an hneh leh si loh avangin sawiseltu a ngah hle.

Ronaldo chauh hi Portugal team-ah hian kum upa a ni lo a, kum 41 mi Pepe bakah kum 36 mi goalkeeper Rui Patricio te pawh squad-ah an la tel. Kum upa pathum te hi bul la ṭan vek thei an la ni tlat.

Chutihrualin Portugal hian tlarhmaah Rafael Leao, Joao Felix, Goncalo Ramos, Diogo Jota leh Pedro Neto te an nei a, bul ṭantir châkawm tak vek an ni. Midfield-ah pawh Bernardo Silva leh Bruno Fernandes te an awm a, tlarhnungah pawh Pepe bakah Ruben Dias, Danilo Pereira, Nuno Mendes, Diogo Dalot leh Joao Cancelo te an awm a, bul ṭan phak nih a harsa ang.

Portugal hian Euro C'ship hmain Finland (Zanin dar 12:15), Croatia (June 8) leh Ireland (June 12 zan) te nen friendly match an khel dawn a, inelna ṭan huna rinrawl ni tur tan chet ṭhat a ṭul ang.

Czech Republic hi

Czech Republic hi FIFA ranking-ah 36-na an ni mek a, match hnuhnung pathumah an chak zawn tawh. Qualifier-ah Czech hi Poland chungah an awm a, chutihrualin team ṭhaa chhal erawh an harsa thung.

West Ham midfielder Tomas Soucek (Caps 68) chu captain a ni a, club tana khelhpui Vladimir Coufal (caps 40) nen ram tana match 40 khel tling thei an ni .

Czech hian Europa Conference League final khel thei Fiorentina player Antonin Barak an kawl bakah Bayer Leverkusen player pathum Patrik Schick, Adam Hlozek leh Matej Kovar te an kawl. Heng player palite hian season an hman ṭhat avangin Euro C'ship-ah Czech tan an pawimawh thei ang.

Rin thiam har Turkey

Turkey hi World Cup 2002-a pathumna an nih avangin ram inelnaah lar hluai mah se kum 2002 hnu khan World Cup an khel pha leh tawh lo. Chutihrualin Euro 2008 khan semifinal an thleng thei a, Euro 2012-ah inlan pha loin inelna hnuhnung pahnihah group stage-ah an tla.

Tun ṭumah hian Turkey hi Vincenzo Montella hnuaiah an khel dawn a, Italian manager hian Turkey a enkawl hmain Fiorentina, Sampdoria, Milan, Sevilla leh Adana Demirspor te a enkawl tawh.

Montella hote hian Euro qualifier inkhel pawimawhah Croatia an hneh thei a, friendly match-ah nikum khan Germany an hneh leh bawk. Mahse, kuminah Hungary leh Austria te hmachhawnin an hneh lo ve ve. Euro 2024-a inrintawkna neih theih nan Italy leh Poland nen friendly match khelh hunah chet ṭhat an mamawh hle.

Rin hlawh lo Georgia

Georgia-in a vawi khat nan inelna lian tham an hmachhawn dawn a, FIFA ranking-a 75-naa awm team hi beisei san an har. France right back hlui Willy Sagnol-a enkawl Georgia tan group stage paltlang ringawt pawh a hlu ang.

Mahse, Georgia hian tun hnaia khawvel huapa player langsar ni pha Khvicha Kvaratskhelia an kawl a, Serie A-a Napoli champion pui thei a nih miau avangin Euro C'ship-ah pawh beiseina an neihsan phah ang.

Kum 23 mi Kvaratskhelia hi Diego Maradona nen an ball khalh dan a inan avangin 'Kvaradona' hminglem an pek hial a ni. Euro 2024-ah Georgia-in football khawvel a barakhaih dawn a nih ngai chuan Kvaratskhelia hi a chet ṭhat a ṭul ang.