Vellore-ah Covid-19 vei Mizo a thi

Nimin zing dar 7:30 vel khan Christian Medical College (ZMC), Vellore-a kal (kidney) ṭha lo leh Covid-19 vei vanga enkawl LP Laldampuia (41), Zobawk, Lunglei chu a thi a; a thih hnua a swab sample endikah a negative tawh avangin Mizoramah rawn hawpui tum a ni.

CMC, Vellore chaplain Rev. Lalbiak­sanga Pachuau hnen aṭanga thu dawn danin, LP Laldampuia hi kal ṭha lo vangin kum 2013 vel aṭangin Vellore-ah an awm ṭan a, haw loin, in luahin an awm chilh char char a ni. Covid-19 symptom a neih avangin a swab sample endik a ni a, September 28, 2020 khan Covid-19 a vei tih hmuh chhuah a ni.

Covid-19 chungchanga sorkarin kalphung a siamah, hripui vei thite chu hmun danga phur sawn loin, an thihna hmun (khua)-a phûm (hâl) tur a ni a; LP Laldampuia pawh hi Covid-19 positive a la nih chuan Vellore-a vuia phûm tur niin, a negative a nih erawh chuan Mizorama hawpui theih beisei a ni. A dinhmun hre turin nimin chhun khan a swab sample endik nawn leh a ni a, a negative tawh avangin an ina hawpui turin buaipui zui nghal a ni.



Share this Post

Login to comment
No Comments