Francesco Bagnaia bawk a chak

MotoGP champion lai Francesco Bagnaia chu tun hnaiah a che fuh thei hle - Pathianni zana tlan zawh tak Italian Grand Prix-ah Bagnaia a chak ber a, intlansiak hnuhnung pahnihah a chungnung ber ve ve tihna a ni.

Mugello Circuit-a intlansiakah Bagnaia a chak lai hian, tun season rider championship hmahruaitu Jorge Martin erawh pathumnaah a thleng a, champion tuma an inumna lamah pawh an inkar a zim sawt, point 39 aṭangin point 18-ah a tlahniam tawh.

Bagnaia ang bawka Ducati bike khalhtu Enea Bastianini chu pahnihna niin, tawnhriat nei ṭha Gresini Racing rider Marc Marquez chu palina a ni thung a, world champion vawi ruk ni tawh hian kuminah nomawi chawi a la beisei ngam zel ve bawk.

Italian rider Bagnaia chuan, "A bul ka ṭan dan a awlsam lo a, a tawp ka khar dan erawh duhthusam a ni thung. Kan elpuite an ṭhat hi chuan second khat lek pawh inthlahdah hi a thiang lo tihna a ni a, chutiang kara hnehna chan chu a hlu bik," a ti.

Bike intlansiakna sang ber hi June 30, Pathianni tlaiah an tlan chhunzawm leh ang. TT Circuit Assen-ah Dutch Grand Prix an tlan leh dawn a ni.