European Super League-ah Juventus tel dawn lo

Italian club ropui Juventus chuan European Super League din tumna chu bansanin, European Club Association (ECA) a inziahluh leh an dil a, ECA hian lawm takin an lo pawm.

ECA chairman Nasser Al-Khelaifi chuan, "ECA chuan kan duhnate min ṭawmpui a, thawhhona ṭha neih duh a, hmasawn zel duhtute tan kawng a hawng reng a ni," a ti a, Juve chuan European football chhuangkua an zawm leh ta, a ti bawk.

Kum 2021 khan European football-a club langsar 12-te chuan ESL din turin hma an la a, AC Milan, Atletico Madrid, Barcelona, Inter Milan, Juventus leh Real Madrid te bakah Premier League 'Big Six' hming lem an pek, Arsenal, Chelsea, Liverpool, Manchester City, Manchester United leh Tottenham Hotspur te an ni.

Mahse, fan-ten duh lohna nasa tak an lantir avangin club-ten an thutlukna hi kaltlangpui ngam loin an sut leh hlawm a, darkar 72 chhungin ESL ruahmanna chu tihchhiat a ni. Hemi hnuah hian club pakuate chu ECA-ah lut lehin, Juventus nen chuan 10 an kir dawn tihna a ni a, Real Madrid leh Barcelona chu ESL din tumtu awmchhun an ni tawh thung.

May thla khan Spanish court chuan FIFA leh UEFA te chu ESL-a tel tum club-te dang thei an nih loh thu sawiin, thuchhuah an lo siam tawh a, mahse, a tel tum club ber an inhnuhdawh tak zelah chuan European Super League hi kan hmuh a rinawm ta lo.