October 15, Ningani khan Mizoramah Covid-19 vei mi pakua hmuh chhuah a ni a, nimin khan Aizawl leh Serchhipah hmeichhia pakhat ve ve hmuh belh a ni bawk. Mizorama hripui kai hmuh tawh zat chu 2,231 a ni. Nimin khan mi paruk chhuahtir an ni thung.

Covid-19 vei Ningania hmuhte chu - ZMC laboratory-a hmuh mi pahnih, Kolasib, Mamit leh Hnahthial damdawi-ina TrueNAT-PCR hmanga hmuh mi pathum leh Rapid Antigen Test (RAT) hmanga Aizawla hmuh mi pali an ni. Niminah Dawrpui leh Serchhipa hmuhte chu hmeichhia kum 29 leh kum 35 mi an ni a, symptom an nei ve ve a ni.

Sorkar thuchhuah tarlan danin, nimin khan Covid-19 laka fihlîm tawh mi pakua chhuahtir an ni a; ZMC leh Thenzawla AYUSH Hospital aṭangin mi pakhat ve ve, Berawtlang CCC leh Lunglei Sazaikawn CCC aṭangin mi pahnih ve ve an chhuak.

Mizoramah Covid-19 vei mi 2,230 hmuh chhuah a ni tawh a, mipa 1,828 leh hmeichhia 403 an ni. An zinga mi 2,127 (95.38%) chu chhuahtir an ni tawh a, enkawl mek mi 104 (4.62%) an la awm. Mi 2,231 zinga mi 1,561 chu state páwn aṭanga rawn lut an ni a, mi 670 chu Mizorama kái chhâwng an ni.

October 15 khan ZMC laboratory-ah swab sample 285, district pasarihah TrueNAT-PCR hmangin sample 148 leh RAT hmangin district 10-ah sample 1,000 endik a ni a; a vaiin swab sample 1,433 niin, chu'ng aṭang chuan Covid-19 vei mi pakua - mipa panga leh hmeichhia pali hmuh a ni.

ZMC- laboratory-a RT-PCR hmanga hmuh chhuahte chu Ramhlun North-a hmeichhia kum 34 mi leh Tuikual North-a mipa naupang kum 10 mi an ni a; Mizoram chhunga kái chhâwng ve ve an nih thu, sorkar thuchhuahin a tarlang.

TrueNAT-PCR hmang­in Covid-19 positive mi pathum hmuh chhuah a ni a, an vaiin tun hnaia state páwn aṭanga rawn lut, quarantine facility-a awm lai vek niin, Covid-19 symptom an nei lo.

Kolasib District Hospital-ah mipa kum 37-a upa, Bihar aṭanga mutia hna thawk tura rawn lut hmuh a ni a; Mamit District Hospital-ah hmeichhia kum 34-a upa, Assam lam mi hmuh a nih bakah, Hnah­thial Hospital-ah West Bengal mi mipa kum 26-a upa, Mizorama labour hna thawk hmuh chhuah a ni.

RAT hmanga hripui vei hmuh chhuahte chu Aizawla mipa leh hmei­chhia pahnih ve ve, kum 16 leh 60 inkar an ni a; Chhinga Veng, Dawrpui leh Zotlang venga mite an ni.

Share this Post