Muaythai team hlawhtling

India rama Muaythai inelna sang ber UMAI National Muaythai Championship 2024 zawhfel takah - Mizoram chuan gold medal 21, silver medal paruk leh bronze medal pakua, a vaiin medal 36 an hlawh chhuak.

Tepesia, Sonapur, Guwahati, Assam-a inelna neihah Mizoram hi a pumpuiah pangana an ni a, a thlengtu Assam an champion thung. Mizoram hian player 40, team official leh coach bakah referee & judge te nen mi 46 a tir a, tun ṭum hi kum 2004-a Mizorama Muaythai Association din a nih hnuah National Championship-a players an tirh hnem ber ṭum a ni.

Mizoram team manager Lalnuntluanga chuan, "Tun ṭum National championship-ah hian team champion nih kan tum hle a, team kan intirh len ber ṭum ni mah se state lian dang player 100 chuang tir an tam hle a, weight category a tam avangin overall champion nih a harsa.

"Coach Lalchhuanawma hoin MTC, Edentharah thla hnih dawn inbuatsaihna kan nei a, chutihlaiin phai khaw lumah kan nauten harsatna an tawk nasa hle a, a bikin player naupang, phaia la zin ngai lo an tam avangin harsatna kan tawk.

"Kan medal lak danah kan lungawi tawk viau a, hei aia ṭha zawk pawha che thei erawh kan ni. Kan harsatna hrang hranga theihtawpa min buaipuitu Guwahati L.O. Dr. Saithangpuia chungah lawmthu kan sawi tak meuh meuh bawk," a ti.