Chelsea-in Adarabioyo an hnaih

Season thar atana insingsa mek Chelsea-in transfer bazar lam an hawi leh vat a, Fulham defender Tosin Adarabioyo chu free transfer-in an la lut hnai - he thuziak i chhiar meuh chuan an in la lut fel tawh hial mai thei.

Kum 26 mi defender hi kar hmasa lam khan Chelsea nen hian an indawr tawh a, London club hian tun kar chhunga medical nei turin ruahmanna an siam. Nimin lamah medical a neih tawh leh tawh loh he thu buatsaih a nih lai hian kan hre lo.

Newcastle United leh Manchester United pawhin an duh defender hi Fulham pawhin chelh an tum a, mahse, an club player hlawh hnem pawl ni tura an dawrna chu hnarin Blues zawm a thlang ta zawk.

Manchester City academy aṭanga inzir chhuak Adarabioyo hian Magpies a zawm hman ṭep a, mahse, Chelsea hian an club ruahmanna te, coach thar tur Enzo Maresca-a' duhdante an sawi hnuin, English defender hi an hmin thei niin khawthlang media-te chuan an tarlang.

Chelsea hian Adarabioyo hian attacking leh defensive set-piece ah an club a puih theih an beisei niin khawthlang media-te chuan an tarlang a, set-piece coach thar Bernardo Cueva chu Brentford aṭanga la lutin set-piece department din an tum niin an sawi.

London club thuneitute hian set-piece lam hi an ngai pawimawh hle niin a lang a, coach chhuak ta Mauricio Pochettino nena an inrem theih lohna pawh a ni. Argentine coach khan set-piece department awm ṭul a ti lo a, Blues thuneitute nen an thu a inhmu lo.

Adarabioyo hian Chelsea a zawm a nih chuan Trevoh Chalobah a chhuah a rinawm a, an club academy aṭanga inzir chhuak defender hi Manchester United nen sawizawm a ni.