Cable TV digitalise chungchang sawiho

Mizorama cable TV analog signal hmanga pek chhuah ṭhin, digital signal-a leh hna kalpui meka hmasawn dan leh harsatna awm-te nimin khan additional chief secretary Arvind Ray hoin Secretariat conference hall-ah sawiho a ni a; chak zawka hmalak theih dan tur an ngaihtuah nghal.

Meeting-ah hian cable TV operator-te chuan, an duhkhawp set top box an kawl thu an sawi rualin, analog signal tihtawp a la nih loh avangin mipui zingah set top box neih la tum lo an awm chu an harsatna lian ber a nih thu an sawi a, "Set top box kawl sa, ṭêkin a den chhiat vanga siam ṭhat ngai pawh a awm nual. Tuna set top box vuah tawh chinah analog TV hun laia mi ang tho khan fee khawn a la ni rih a, hei hi mipuite’n an hlâwkpui zawk," an ti.

Tun dinhmunah Mizoramah digital signal pek chhuah phalna Multi System Operator (MSO) provisional licence nei operator 10 an awm mek a; khaw tina cable TV operator-te’n MSO licence nei tawhte hnen aṭangin an pawt chhâwng ve leh thei.

Meeting-ah hian sorkar offcial-te bakah MICODA, Mizoram Consumer Union, LPS Vision, ZONET Cable TV Pvt. Ltd. leh district hrang hranga cable TV aiawhte an tel a ni.