Vanglaini - Minister-hoin Hnahthiala VC-te thil pawimawh zirtir

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

Minister-hoin Hnahthiala VC-te thil pawimawh zirtir

Nimin khan Hnahthial Electric Veng indoor stadium-ah VC-te tan thil pawimawh inzirtirna hun buatsaih a ni a, South Tuipui bialtu MLA Dr R Lalthangliana, minister-in a hmanpui.

Inkhawm hi Lungleia LAD officer J Miahlung-in a kaihruai a; Dr R Lalthangliana chuan, Hnahthial district VC tharte chu an hmalakna hrang hrangah thlei bik leh duhsak bik nei loa rorel turin a chah a, "VC-te hi sorkar hmalakna hrang hrangah a bulṭhuta awm, mipui dinhmun hre chiang bertu leh mipui nghèng hnai bertu an nih avangin, ram hmasawnna kawngah leh remna leh muanna humhalh kawnga an pawimawhzia leh an mawhphurhna sanzia an hriat thar a pawimawh," a ti.

Hnahthial DC Vanlalmawia chuan, "Kawng hrang hranga VC hmalaknaah khawtlang tana ro tling hmasawnna ruhrel ruahman leh mipui tam zawk tana eizawnna ngêlnghet siamsak ngai pawimawh hmasa ṭhin ang che u," a ti a, mamawh an neihte chu DC office-a thlen vat turin a chah.

Hnahthiala VC-te chu LAD joint director Lalchawimawia, Hnahthial SP Lalbiakkila, Covid-19 nodal officer Dr R Lalsanglura leh DLAO Zodingliana ten thil pawimawh hrang hrang an zirtir a ni.

Share this Post

Login to comment

No Comments