Jal Jeevan Mission sawiho

Chief minister Zoramthanga leh PHE changtu deputy chief minister Tawnluia hoin nimin khan Cabinet room-ah PHE department hotute'n Mizorama Jal Jeevan Mission (JJM) kalpui mek chungchang an sawiho.

Meeting-a tarlan danin, JJM hi India rama thingtlang khuaa in tinah tui connection pek a, tui thianghlim ni khatah litre 55 tal pek theihna tura duan a ni. Kum 2019-20 chhung khan Mizoram chu JJM hmalaknaah state zinga thawk ṭha pawl a ni a, sorkar laipui aṭangin lawmman (incentive) a dawng a, hmalakna tur sum bithliahsak aia tam a dawn phah a ni.

Kuminah state hrang hrangte'n Covid-19 avangin hma an la chak thei lo a, Mizoramah pawh duh anga chêt theih a ni lo. Mizorama JJM kalpuina tur khua leh bâwk awm zat belhkhawm chu 722 a ni a; khua 78 chu in tiahn tui connection pek a ni tawh.

PHE department engineer-te chuan, tun dinhmunah tui connection siam chu tui lakna awlsam chin a la nih thu an sawi a, "Kum lo awm leh turah chuan tui lâkna harsa deuh zawkte a la awm dawn avangin chung atan chuan hmalakna thar siam tel a ngai," an ti.

Chief Minister leh Dy. Chief Minister chuan, PHE engineer-te thusawi chungchangah hian ruahtui khâwl (rainwater harvesting) lama nasa zawka hmalak pawimawh an tih thu an sawi a ni.



Share this Post

Login to comment
No Comments