Land Revenue and Survey Board chu nimin khan an chairman Lalruatkima, LRS minister hoin Land Revenue & Settlement (LRS) directorate conference hall-ah an ṭhukhawm a, hmalakna tur hrang hrang an ngaihtuah.

LRS Minister chuan, an department chu mipui nghêng hnai ber department-te zinga mi a nih thu sawiin, "A tel loa awm theih loh, hmasawnna hna tam zawk pawh lei behchhan (land based)-a thawh a ni. Dan dik taka mipuite'n ram kan neih theih nan te, mipui sum sorkar revenue-a chhûn tur chhiah tam zawk felfai taka lak a nih theih nante leh ram buai tam tak awm mek chinfel tuma hmalak a nih dante leh MIRSAC-te nena thawk hoin ram thliar fel ‘land zoning’ tih tum a ni," a ti.

Meeting-ah hian Expert Committee on Land Reforms-in rawtna an siamte chipchiar taka en a ni a, rawtna eng emaw zat sawiho a nih hnuah en hman lohte chu ṭhutkhawm leh huna en turin an dah.

Meeting-a tarlan danin, district thar pathum - Saitual, Khawzawl leh Hnahthialahte settlement officer-te'n hna an thawk ṭan tawh a, surveyor pawh dah vek tawhin, Revenue office-te chu ṭha takin an kal thei tawh a ni.

Share this Post