Vanglaini - Covid-19: Mizoram dinhmun Enkawl mek mi 99 an awm

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

Covid-19: Mizoram dinhmun Enkawl mek mi 99 an awm

October 14, Nilaini khan Mizoramah Covid-19 vei mi pariat hmuh chhuah a ni a, Mizoram chhunga kái chhâwng mi pasarih leh state páwn aṭanga rawn lut mi pakhat an ni. Hripui laka fihlîm tawh mi 13 chu nimin khan chhuahtir an ni a, enkawl mek mi 99 chiah an awm ta.

Nilainia Covid-19 positive hmuh chhuahte chu - ZMC laboratory-a hmuh chhuah hmeichhe pakhat, Rapid Antigen Test (RAT) hmanga Aizawl leh Kolasib-a hmuh chhuah mipa pahnih leh hmeichhia panga an ni a; TrueNAT-PCR hmangin district pasarihah swab sample endik ni mah se, hripui vei hmuh a ni lo.

Nimin khan Covid-19 laka fihlim tawh mi 13 chhuahtir an ni a; Lunglei Zobawk CCC aṭangin mi pasarih, Kolasib CCC aṭangin mi pahnih leh CIJWS, Vairengte aṭangin mi pali an ni. Hripui vei tawh lo tih finfiah tawh, la chhuahtir loh an awm nual bawk.

Mizoramah Covid-19 vei mi 2,220 hmuh chhuah a ni tawh a, mipa 1,823 leh hmeichhia 398 an ni. An zinga mi 2,121 (95.54%) chu chhuahtir an ni tawh a, enkawl mek mi 99 (4.46%) an la awm. Mi 2,220 zinga mi 1,558 chu state páwn aṭanga rawn lut an ni a, mi 662 chu Mizorama kái chhâwng an ni.

October 14 khan ZMC laboratory-ah swab sample 220, district pasarihah TrueNAT-PCR hmangin sample 91 leh Rapid Antigen Test (RAT) hmangin district pakuaah sample 1,092 endik a ni a; a vaiin swab sample 1,403 niin, chu'ng aṭang chuan Covid-19 vei mi pariat hmuh a ni.

Sorkar thuchhuah tarlan danin, ZMC laboratory-a RT-PCR hmanga mi 220-te swab sample endik aṭangin hripui vei pakhat hmuh a ni a, Dinthar venga hmeichhia kum 43 mi niin, home quarantine-a awm lai, Covid-19 symptom nei lo a ni.

RAT hmangin Aizawlah mi paruk (mipa pahnih leh hmeichhia pali), kum 26-60 inkar hmuh chhuah a ni a; Dawrpui venga mi pahnih, Ramhlun South, Kanan Veng, Dinthar leh Bawngkawna mi pakhat ṭheuh an ni. An zinga pakhat chu Assam aṭanga rawn haw, quarantine facility-a awm lai a ni a; pangain symptom neiin, pakhatin a nei lo.

Kolasib-ah pawh RAT hmangin Covid-19 positive pakhat, hmeichhia kum 23 mi hmuh chhuah a ni a, symptom a nei lo. Amah hi Aizawl lam mi, Kolasib-a nurse zirlai a ni.

Covid-19: Mizoram dinhmun

(October 14, 2020; 5:00 P.M.)

DistrictPositiveEnkawlChhuak

tawh zatmek zattawh zat

Aizawl1,433511,382

Lunglei26716251

Siaha31031

Champhai24123

Kolasib24315228

Serchhip65461

Lawngtlai82478

Mamit53647

Saitual13211

Khawzawl404

Hnahthial505

TOTAL2,220992,121

Share this Post

Login to comment

No Comments