Vanglaini - Ramria Assam laka tlânchhiaah ZPM-in Mizoram sorkar an puh

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

Ramria Assam laka tlânchhiaah ZPM-in Mizoram sorkar an puh

Zoram Peoples' Movement (ZPM) party chuan thuchhuah siamin, Mizoram leh Assam ramri chungchangah Mizoram sorkar chu tlânchhiaah an puh.

ZPM chuan, kar hmasaa Thinghlun khaw dáia John Zolawma thlám hàl leh a kaihhnawihah October 14, Nilaini khan Mamit DC leh Karimganj DC-te Kanhmunah an inbia tih sorkar thuchhuahah tarlan a nih thu an sawi a; Mizoram sorkar aiawhte thil sawi chungchangah, "Thinghlun khaw ram chu Mizoram chhung ngei a nih thu huai taka ṭang ngam lo a, 'Kan pi leh pute aṭanga ta anga kan lo en ṭhin' ang leka Mizoram sorkarin a lo ngai hi a lungchhiatthlak hle a ni," an ti.

ZPM party-in DIPR press release-a ziah dan an tarlang a, Mizoram sorkar aiawhte an ṭawng huai ngam loh laiin, Karimganj DC Anbamuthan chu huai takin a ṭawng thung tih an sawi.

Sorkar thuchhuahah hian, "Anbamuthan MP, Karimganj DC pawhin thil duhawm lo thleng chu pawi a tih thu sawiin, chutihrualin, thil thlenna hmun chu Singla Forest Reserve hnuaia awm, Karimganj district chhunga mi a nih avangin an thuneihna zahsak turin Mizoram lam official-te chu a ngen a ni," tih a ni.

ZPM tarlan danin, DC level meeting-ah Assam sorkar aiawh Karimganj DC-in Thinghlun khaw ram chu 'Singla Forest Reserve hnuaia awm, Karimganj district chhunga mi' tia huai takin a sawi ngam a; Mizoram sorkar aiawh Mamit DC erawh chuan, 'Hmânlai kan pi leh pute aṭanga mahni ta anga kan lo cheibàwl ṭhin, huan lo ram thlenga kan neih ṭhinna a nih avangin hun lo kal zel turah pawh a hma anga neih chhunzawm reng theih an inbeisei' tiin a sawi thung.

John Zolawma thlám bul maia Thinghlun VTF duty-na bûk chu Assam lamin an ram chhung angah an chhál tih sawiin ZPM chuan, "An ngaimawh avanga 'Mizoram sorkar thupek ngeia hâl' a nih avangin Mizoram sorkar chuan mahni ram chin a humhalh ngam loa a tlanchhiat tâk avangin Assam lam hi an pâwngpawrh a, a bula John Zolawma thlám pawh rawn hâl ni ngeiin kan ngai," an ti.

ZPM chuan, MZP-in ramri humhalhna atana hnatlang koa Thinghlun dáia John Zolawma thlám an sa ṭha leh chu fakawm an tih thu an sawi bawk.

Share this Post

Login to comment

No Comments