October 14, Nilainia Mizorama Covid-19 hripui vei hmuh chhuah mi pariat zinga pasarih chu Mizoram chhunga kái an nia hriat a ni a; taksaa harsatna nei (Covid-19 symptom lang) mi panga an awm. Mi panga chu Aizawl tualchhunga kai an nia hriat a ni bawk.

Tun dinhmuna Covid-19 positive mi 20 vel awmna Dawrpui vengah hripui vei mi pahnih hmuh belh leh a ni a, anni hi hmeichhia, Covid-19 symptom nei ve ve niin, an venga hripui vei tawhte aṭanga kai an nia hriat a ni.

Dawrpui veng kaihhnawih tho nia hriat, Dinthar veng mi, hmeichhia kum 43 mi pawhin Covid-19 a vei tih hmuh chhuah a ni a, ani hi chuan symptom a nei lo.

Kanan Vengah mipa pakhat hripui vei hmuh chhuah thar a ni a, ani hi Tuikual North-ah motor workshop a neih avangin Tuikual North-a hripui vei tawh (vei mek)-te aṭanga kai nia hriat a ni. Kanan Veng LTF Chairman chuan, contact tracing tih ngai tlem azáwng a awm a, chhungkaw panga vel chu an inkhungtir phawt tih a sawi.

Ramhlun South LTF Chairman chuan, an venga hripui vei hmuh thar chu mipa a nih thu sawiin, "Amah hi chuan symptom a nei lo a, a nupui zawkin symptom a neia an hriat avangin an nupain RAT hmanga test a ni a, a nupui a negative laiin, amah hi a positive a ni. A nupui leh an chhungte dang pawh vawiin (Ningani) hian ZMC-ah RT-PCR hmangin test leh an ni a, result kan la hre lo," a ti.

Mizoram chhûnga kái hmuh tharte

Bawngkawn - 1Hmeichhia, a kài chhan hriat loh, symptom nei, a kài chhàwn theih chhui zui a ni.

Dawrpui - 2Hmeichhia ve ve, symptom nei, an veng mite aṭanga kái nia hriat.

Dinthar - 1Hmeichhia kum 43, Bazar Bungkawna dawr nghâk ṭhin, symptom nei lo. (Dinthar venga hmeichhia pakhat dang hmuh chu state pawn aṭanga haw a ni)

Kanan Veng - 1Mipa, symptom nei, Tuikual North-ah workshop a neih avangin chuta ṭanga kai chu nia hriat a ni.

Ramhlun South - 1Mipa, tualchhunga kai, kaina hre lo. Symptom a nei lo.

Kolasib - 1Hmeichhia kum 23, Aizawl mi, Kolasib-a nurse zirlai, symptom nei lo.

Share this Post