Fisheries minister K Lalrinliana chuan nimin khan thuchah a tichhuak a, Mizoram Fisheries Amendment Act 2016, Section 5(1) tlawhchhanin mipuite chu sangha fuan rût lo turin a hriattir.

K Lalrinliana chuan, tunlai hi Mizorama luiah sangha fuan hun a ni tih tarlangin, "Mizoram Fisheries Amendment Act 2016, Section 5(1) tlawhchhanin October 15 aṭanga November 15, 2020 chhung hi sorkar chuan ‘closed season’ atan a puang a, hemi chhung hian sangha fuan rût lo turin kan inhriattir a ni. He dan hian sangha fuan tur tihbuai a khap tlat a, dan bawhchhetute chu pawisa chawi leh lung-in tàn thlengin hrem theih a ni," a ti.

Lui dung humhalh nachang hriat loh ṭhin vangin Mizorama luite a chereu mek zel tih tarlangin Minister chuan, "Nikuma ICAR scientist-te'n kan lui dung an zirchiannaa an hmuh chhuah danin, lui dunga nungcha ṭhenkhatte phei chu rîral (extinct) mai thei dinhmunah an ding tawh a ni," a ti a; Mizoram luiah nungchate an pun leh theih nan sangha fuan rût lo a, sangha fuan leh lui dung nungchate venghim zawk turin mipui a sáwm a ni.

Share this Post