Vanglaini - RD Sangkhuma Ex MLA a thi

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

RD Sangkhuma Ex MLA a thi

RD Sangkhuma (75), Ex MLA, Zuangtui chu nimin tlai dar 4:10 khan kal (kidney) ṭha lo avangin Aizawl Hospital & Research Centre-ah a thi a, vawiinah vui a ni ang.

RD Sangkhuma hian kum 1971-a Shillong aṭanga BA a zawh hnuah Mizo Union a zawm nghal a, kum 1972-a Mizoram MLA inthlan hmasak berah Ratu bial aṭangin thlan tlin a ni a; MLA a nih hian kum 27 a ni a, tun thlengin Mizo zinga MLA atana thlan tlin naupang ber a la ni.

Kum 1974-a Mizo Union leh Congress party an inzawmah tel ve loin, opposition MLA a ni a, opposition deputy leader atan ruat a ni. Kum 1998 khan Aizawl East-I bialah Ṭangrual Pawl ticket-in a ding leh a, a tling zo lo a, politics a chawlhsan zui nghal.

RD Sangkhuma hian kohhran, khawtlang leh infiamna lam pawlah nihna pawimawh hrang hrang a chelh a, Mizoram Football Asso-ciation honorary secretary hlui a ni. Kum 2013 khan an làwina Zuangtui Presbyterian Kohhranah tualchhung upa atan thlan a ni.

Share this Post

Login to comment

No Comments