Vanglaini - Sorkar hna ringawt chuan ṭhalaite a tlin dawn lo

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

Sorkar hna ringawt chuan ṭhalaite a tlin dawn lo - CM

MEDMOC leh Mizoram University Incubation Centre-te'n mahni kutkawih leh hmangcháng hriatna hmanga eizawnna nei tura Mizo ṭhalaite an dinhmun zir chianna, 'Mapping General Enterprising Tendency Among Mizo Youth' chu nimin khan CM conference hall-ah thlirho a ni. Chief minister Zoramthanga chuan, eizawnnaah sorkar hna ngawtin ṭhalaite a tlin dawn loh thu a sawi.

Chief Minister chuan, entrepreneurship tihhmasawn chu thil pawimawh a nih thu sawiin, "Hemi atan hian zirchianna aṭanga a lan danin, zirlai naupang an nih lai aṭanga a remchan dan anga syllabus-a telh te, training pek thuhlaah pawh awmze nei taka an kum mil zela zirtirna duan te, puitling zingah chuan hman nghal mai theih tur inzirtirna pekte a pawimawh," a ti.

School Education minister Lalchhandama Ralte chuan, MEDMOC leh MZU Incubation Centre-te zirchianna chu ṭha a tih thu sawiin, "Mizo ṭhalaite zinga theihna leh thiamna awm hi kaihhruai a, belhchhah a pawimawh. Zirlaite syllabus-a entrepreneurship development telh a ṭangkai hle ang," a ti a; school syllabus chu a hma kuma duan lâwk a nih avangin ruahmanna felfai tak siam lâwk a ṭul thu a sawi.

Mapping General Enterprising Tendency Among Mizo Youth atan hian Mizoram hmun hrang hranga HSS leh college zirlai mi 2,255-ah zawhna siam a ni. Zirchianna aṭang hian Mizo ṭhalaite'n entrepreneur ni turin theihna an nei ṭha a, ram hrang hrang nen khaikhin pawhin an score a inang khat viau tih hmuh a ni.

Share this Post

Login to comment

No Comments