Vanglaini - Mi hnuaihnung leh kuthnathawktute Kan ngai pawimawh ṭhin

KHAWTHLIR

ATC BD result

Senate of Serampore College hnuaia Bachelor of Divinity (BD) final year result nimin khan a chhuak a; hriat theih chinah Aizawl Theological College (ATC) aṭanga zirlai 25 exam zingah mi pali chu first class (A-)-ah an pass a, second class (B+)-ah mi 17 leh B-ah mi pathum an pass bawk. Back paper neih vanga la pass lo pakhat a awm a ni.

ZPM ṭhalai hruaitu

Zoram Peoples' Movement (ZPM) office bearers-te nimina an president Lalliansawta hoa ṭhukhawm chuan ZPM Ṭhalai president atan Malsawmzuala, Mission Veng an ruat nawn. Vice president atan Lalṭanpuia Zote, Bethlehem Vengthlang leh treasurer atan H Vanlalhuma, Mission Veng-te ruat an ni bawk.

Ambulance pe

Lawngtlai West bialtu MLA C Ngunlianchunga chuan a MLA fund hmanga a lei ambulance thar chu nimin khan Mizoram State Cancer Institute, Zemabawk hnenah a hlân. C Ngunlianchunga chuan, damdawi-ina ambulance a pek chu politics-a thangṭhat lak tum vang a nih loh thu leh, cancer natna tuarte harsatna sutkian a duh vang a nih thu a sawi.

Mask puan sem

Aizawl North-II bialtu MLA Dr Vanlalthlana chuan Covid-19 vanga harsatna tâwkte ṭanpui nan nimin khan a biala self help group (SHG)-te hnenah hmai tuamna (mask) siamna puan (non-woven material) leh elastic band a sem a, SHG-te'n mask an ṭhui tawh ṭhahnem tak chu mipuia sem leh turin a leisak nghal.

ICU-ah 4 enkawl

State Referral Hospital-ah Covid-19 vei vangin mi 36 enkawl mek an ni a, an zinga panga chu nimina dah luh an ni. SRH-ZMC Bulletin tarlan danin, hripui vanga SRH-a enkawl mekte chu Mizo vek, mipa 15 leh hmeichhia 21 an ni a, a naupang ber thla 8 mi niin, a upa ber kum 73 a ni. Mi pali chu ICU-ah enkawl an ni a, ngaihtuahawm erawh an ni lo. Mi dang zawng chu ward-ah enkawl an ni.

Loneitute zirtir

Aizawl district-a Agriculture department chuan nimin khan 'Ei leh bara intodelh' tih thupui hmangin Muallungthu community hall-ah awareness campaign an buatsaih a, thil pawimawh hrang hrang loneitute an zirtir. Covid-19 avangin nakkum lamah ṭàm thleng palh thei a nih avangin, nasa lehzuala ṭan lak a ngaih thu

an tarlang.

DAWNTISEI

Mi hnuaihnung leh kuthnathawktute Kan ngai pawimawh ṭhin - Hawla

Mizoram Pradesh Congress Committee (MPCC) president Dr Lal Thanhawla chuan, Congress party chuan mi hnuaihnung leh kut hnathawktute ngaih pawimawhah an neih ṭhin thu a sawi.

Nimin khan Aijal Club-ah All India Professionals' Congress (AIPC), Mizoram Chapter hawn a ni a; he huna thu sawitu Lal Thanhawla chuan, "Kan programme leh policy hi Lal Isua inrawlhna tlak a ni em tih ngaihtuah tur. Mi hnuaihnung leh kut hnathawktute kan ngai pawimawh tur a ni tih hi kan hruaitute ngaihdan a ni a, chu chu kan rilruah a awm reng ṭhin," a ti.

MPCC President chuan, sorkarna an chan apiangin mi hnuaihnung leh kut hnathawktute chu an ngaih pawimawh hmasak ṭhin thu sawiin, "Tih tak zeta ti zingah a hlawhtlinpui tam mah se, duh khawpin NLUP a hlawhtling tâwk lo. Duh angin a marketing lam a ṭha tawk lo a, Bangladesh leh UAE-ahte mithiam kan intír a ni," a ti a, marketing ṭha zawk an buaipui fel hmain an tlâk tak thu a sawi.

Mizoramah politics chu thil bawlhhlawh taka ngaihna a awm ṭhin tih sawiin Lal Thanhawla chuan, "Ringtu kan nih chuan kan hna ṭheuh dikna leh taimakna nena kalpui tur a ni. Politics a nih avanga tenawm taka inchirtheh tur a ni lo. Dikna leh takna nen mipui kaihhruai a, ei leh bara Mizoram intodelh theihna tur kan ngaihtuah tur a ni," a ti.

Dr Lal Thanhawla chuan, an party chuan chanchin ṭha hril an ngai pawimawh hle tih sawiin, "Sakhaw lian tak tak pathumin min hual vel mah se, chanchin ṭha kan hril chhung chu kan hnam a ral loin ka ring. Chanchin ṭha hril turin border trade ṭha neih a ngai a, chumi atan chuan hma kan la a, kan awm lohin chhunzawm a ni ngai lo," a ti a; border trade phênah chanchin ṭha hril chu an rilru a nih thu a sawi.

AIPC, Mizoram Chapter hawnna inkhawmah hian AIPC chairman Dr Shashi Tharoor leh AIPC regional coordinator (east) Szarita Latiphlang-te thuchah ngaihthlak a ni.

AIPC, Mizoram Chapter-ah hian president chu Dr Henry Zodinliana Pachuau niin, member 28 an awm a; chungte chu professor, lawyer, psychologist, social worker, reasearch scholar-te an ni hlawm.

AIPC hi All India Congress Committee hruaitu Rahul Gandhi hmalaknaa din a ni a, Dr Shashi Tharoor chu chairman a ni. Zirna lama mithiam, doctor, dan hremi, social worker, etc. te thiamna ram leh hnam tana ṭangkai zawka hman theihna atana din a ni. AIPC, Mizoram Chapter hi March 2020 khan pawm a ni a, Covid-19 vangin an hâwng thei lawk lo a ni.

Share this Post

Login to comment

No Comments