Ward XIX by-election hun puang; June 25, 2024-ah inthlang dawn
State Election Commission chuan May 31, 2024 khan Aizawl Municipal Corporation-a Ward XIX-ah by-election neih tur thu a puang. Inthlan hun tur chu June 25, 2024 a ni a, June 6 thleng nomination thehluh theih a ni ang.
AMC Ward-XIX hi Baryl Vanneihsangi Tlau bial a ni a, MLA-ah a tlin avangin a chhuahsan a, a hmun ruak hnawh khat turin by-election buatsaih a ngai. Ward-XIX by-election rual hian Sakawrtuichhun Local Council-a seat pakhat ruak hnawh khahna atan by-election neih tur a ni bawk. Inthlan puan a nih avang hian inthlanna tur huam chhungah Model Code of Conduct hman nghal a ni.
Hmun pahniha by-election neih turah hian June 6, 2024 tlai dar 3 thleng nomination thehluh theih a ni a, hming pek luhte chu June 7, 2024-ah endik tur a ni. June 10, 2024 chawhnu dar 1 thleng inhnuhdawh theih a ni a, June 25 zing dar 7 aṭanga tlai dar 5 thleng vote thlak hun hawn a ni ang.
Ward-XIX by-election a vote tlate chu June 27, 2024 chawhma dar 10 aṭangin chhiar ṭan tur a ni a, Sakawrtuichhun LC by-election-a vote tlate hi vote thlak zawhah chhiar nghal tur a ni thung.
AMC Ward XIX-ah hian local council paruk - Kulikawn, Tlangnuam, Tlangnuam Vengthar, Saikhamakawn, Melthum leh Hlimente a awm a; AMC term kal mekah hmeichhe tana seat hauh bial a ni.
SEC chuan inthlanna him, felfai leh muanawm a awm theih nan inthlanna buaipuitu te, political party, media, tlawmngai pawl leh mipui ṭawiawmna a ngen a; by-election neihna tur hmuna mipui vote nei zawng zawng chu vote thlâk ṭheuh turin a sawm bawk.