Hlimen leh a chhehvel a him lo; Insawn chhuak turin hriattir

Aizawl District Disas­ter Management Autho­rity (DDMA) chairman Nazuk Kumar, Aizawl bawrhsap chuan May 30, 2024 khan thupek chhuahin, Hlimen leh a chhehvel, leimin hlauhawmnaa chêng zawng zawngte chu an chenna chhuahsan a, hmun him lama insawn turin a hriattir.

Aizawl DDMA Chairman chuan, "Mizo­ram State Emergency Opera­tion Centre aṭang leh Directorate of Geology & Mining aṭanga thu dawn danin, Hlimen khua leh a chhehvel leilung a nghet lo hle a, ruahtui tam zawk a tlâk zel chuan chhiatna nasa tak thleng leh thei a ni. Chuvangin, Disaster Management Act, 2005 Section 30(2)(iii)-in thuneih­na min pek angin Hlimen leh a chhehvel, leimin hlauhawmnaa cheng zawng zawngte chu an chenna chhuahsan a, hmun him lama insawn tura hriattir an ni e," a ti.

Aizawl Bawrhsap chuan, Cyclone Remal avangin Aizawl district chu Mizorama chhiatna tuar nasa ber pawl a nih thu leh, chhawmdawlna leh chhanchhuahna hna thawh mek a nih thu a tarlang bawk.

Hlimen huam chhung bikah hian May 28, 2024-a leimin vangin mi paruk an thi a ni.

August 9, 1992 zing khawvar hmaa quarry chim vangin mi 70 an lo thi tawh a, chu'ngte chu Mizo 16 leh hnam dang 54 an ni a; Mizo thite ruang hmuh kim a nih laiin, hnam dang thi zinga mi 31 chu hmuh zawh a ni lo.

July 11, 1986 pawh khan Hlimena quarry chimah mi pali an lo thi tawh bawk nia thu dawn a ni.