Thlanmual min hnatlangin an senghawi

May 28, 2024 zinga Republic Veng thlanmual leh Kulikawn thlanmual min chi nimin khan khawtlangin hnatlangin an senghawi a, Kulikawn thlanmuala ruang la hmuh zawh lohte an zawng.

Kulikawn Joint Thlanmual Committee huaihawtin nimin khan Kulikawn thlân­mual min avanga ruang la hmuh lohte zawn a ni a, leimin belh thei ven nan tarpauline-in an khuh bawk. Ruang hmuh tawhte chu thlanmual hmun rem laiah hmun khatah phûm tura ruahman a ni.

Kulikawn thlanmual min ní hian khawtlang hnatlang ko nghal mah se, ruah a sûr reng avang te, lei a chêt reng avang leh veng chhung hmun hrang hrangah leimin a awm avangtein ngawrh taka hmalak nghal a ni lo a; nimin khan khawtlang hnatlang an ko a ni. Hnatlangte ei leh in senso atan bialtu MLA Lalchhuanthanga'n Rs 5,000 a pe a, ni dangah hnatlan chhunzawm an tum. Kulikawn thlanmual min hian thlan 40 vel a minpuia hriat a ni.

Republic Veng thlanmual minah thlan 20 vel a chhia a, lei khi a la awm nual bawk. Thlan chhiate chu nimin khan Republic Veng Local Council leh YMA bultumin khawtlang hnatlangin an senghawi a, Republic Veng bakah, thlanmual hmangtu veng dang - Upper Republic leh Republic Vengthlang aṭangin mi ṭhahnem tak an thawk chhuak.

Nimina thlanmual min senghawi hnatlang atan hian Republic Venga mimal, sumdawng, kohhran leh pawlten sum senso tur an thawh khawm a, vawiinah hnatlan chhunzawm a ni ang.

May 28-a thlanmual min nasatna ber, thlân 200 vel chhiatna ITI Veng thlanmuala thlân chhiate chu mumal takin an la senghawi thei rih lo. Thlân chhia zinga ṭhenkhat chu thlanmual dangah phûm an tum nia thu dawn a ni.

Kanan Veng, Aizawl thlànmual pawh May 28 zingkarah nasa takin a min a, mi 59 phûmna thlàn 55 a chhia. Thlàn chhiate chu May 28 aṭang khan khaw­tlangin a theih ang angin an senghawi.