Leimin vanga chhiatna thlengah mi 33 an thi

Nimin khan ruah nasa taka a sûr vangin Mizoram hmun hrang hrangah chhiatna a thleng a; Melthum, Hlimen, Salem Veng, Falkawn, Kelsih leh Lungseiahte leiminin in a hnâwl avangin mi 33 an thi. Nimin tlai dar 6 thleng khan mi 25 ruang hmuh tawh a ni a, ruang zawn mek a la awm nual.

Chhiatna thlenna hmunahte hian khawtlangin ruang zawn hna an thawk a, National Disaster Response Force (NDRF), State Disaster Respond Force (SDRF), Central YMA hnuaia Quick Respond Team leh police-te bakah, veng dang aṭangin mi eng emaw zat an thawk chhuak.

Mitthi zingah hian hnam dang an awm nual a, chu'ngte chu tihfel ngaite tihfel a nih hnuah an khuaah ṭheuh thawn tur a ni. Melthum leimina thi zinga mi paruk tih loh chu an khua/veng ṭheuhah vui an ni ang.

MELTHUM

Nimin zing dar 5:30 vel khan Melthum leh Hlimen inkara quarry, Melthum huam chhunga mi chu a chhak lam aṭangin lei a tawlh a, chenna in pathum leh hna thawka awm hnam dangte chenna (camp) a chhilh.

Nimin tlai dar 6 thleng khan mi 13 ruang lak chhuah tawh a ni a, zawn mek panga an la awma hriat a ni. Mitthi zinga pakua chu Mizo an ni a, pali chu hnam dang an ni.

Mitthi zinga paruk - Lalduhthlanga leh a chhungte ruang chu Dinthar, Aizawla an chhungte inah lak a ni dawn. Lalduhthlana te hi Dinthara awm reng ṭhin, tun hnaia Melthuma pém an ni a, pém lehkha an la la lo.

Lalduhthlana fanu Clarie Zorem­mawii (6) chu dama lak chhuah a ni a, damdawi-in panpui nghal niin, enkawl mek a ni.

HLIMEN

Nimin zing dar 6 vel khan Hlimena chen­na in pahnih chu an kawmchhak lama leminin a hnâwl a, mi pariat a hnâwl tela hriat a ni. In pakhat chu Mizo nupa chenna a ni a, pakhat dang­ah chuan hnam dang an cheng.

Nimin tlai dar 6 thleng khan mi paruk ruang hmuh tawh niin, Mizo pahnih leh hnam dang an ni a, mi pahnih, hnam dang ve ve la zawn zui zel an ni. Mizo nupa thite hi H Lalrinmawia leh Lalramthangi niin, kum 50 vel ve ve an ni.

SALEM VENG

Zing dar 5:30 vel khan Lalṭanpuia (41) te chhungkaw chenna in chu leiminin a hnawl. Lalṭanpuia hi a nupui Lalhriatpuii (39) leh an fanu Lalvohbiki (19) te nen chengho a ni.

Chhiatna thlen thu hriat a nih veleh Salem Veng Branch YMA-in hnatlang koin, khawtlangin an zawng nghal a, tlai dar 3:45 velah Lalhriat­puii ruang hmuin, tlai dar 5 hmain Lalṭanpuia leh Vohbiki ruang pawh hmuh ve leh a ni.

FALKAWN

Zing dar 7 velah chhungkaw pakhat chenna in chu leiminin a hnawl a, mi pahnih an thi.

In in a hnawlah hian mi pali an cheng a, chhungkaw nu ber Hma­ngaih­zuali leh Lalthanzama te an thi a, mi dang pahnih chu ngaih­­tuahawm lutuk an ni lo.

Hmangaihzuali leh Lalthanzamat e hi leiminin a chhilh a, Lalthanzama ruang hmuh a ni tawh. Nimin tlai dar 6 vel thleng khan Hmangaihzuali ruang zawn mek a la ni.

HMUN DANG

Nimin zing dar 9:30 vel khan Lungsei (Samlukhai bul) rama thlám pakhat chu leiminin a hnâwl a, thláma awm mek Lalrimawii (63) w/o Lalthangfala, Maubawk, Aizawl a thi.

Aibawkah leiminin in pakhat a hnâwl a, ina awm mek nupa a hnâwl tel a, he thu ziah lai hian zawn mek niin, chanchin kimchang hriat theih a ni rih lo. Kelsih khuaah pawh leiminin in a hnâwlah mi pakhat a thi nia thu dawn a ni bawk.

Phulpuiah pawh leiminin in pathum - Sangdingliana, Deng­rothangi leh K Zosangzuala te in a hnâwl a, hliam an awm nual a, thi erawh an awm lo. Thu dawn danin, hliam zinga pahnih chu Aibawk damdawi-inah lak an ni.

Melthum Silai Muala Trinity Hospital ban thlang lam leimin vangin a inkhai a, hei vang hian damlo eng emaw zat an inthiar chhuak. Damlote chu State Referral Hospital-ah dah tum an ni a, mahse, leiminin kawng a hnawh avangin an indah thei mai lo nia thu dawn a ni.

Heng bakah hian Mizoram hmun hrang hrangah leiminin in a tihchhiat leh chhiatna dang thleng eng emaw zat a awm a, hmun tam takah kawngpui a ping bawk a; chhiatna thleng chanchin kim­chang hriat theih a la ni rih lo.