Police vote thlâk theih loh chhan sawifiah; 'Inthlahdah vang a ni lo' - Home Secretary; 'Theihtawp tak meuh kan chhuah' - DGP

28th May, 2024

Home secretary H Lalengmawia chuan, state páwna Mizoram police duty-te'n Lok Sabha inthlanah vote an thlak theih loh chhan chu sorkar inthlahdah vang a nih loh thu a sawi. DGP Anil Shukla pawhin, "Police-te'n vote an thlak theih nan theihtawp tak meuh kan chhuah," a ti.

Home Secretary leh DGP hian nimin khan Chief Secretary conference hall-ah thuthar thehdarhtute an kâwm a, state páwna Mizoram police duty mi 1,047-te'n Lok Sabha inthlana vote an thlâk theih loh chhan an sawifiah.

H Lalengmawia chuan, March 19, 2024 khan Lok Sabha inthlan dawn avangin Mizoram Police-te chu Election Commission of India (ECI) thuhnuaia an awmna tur order chhuah a nih thu a sawi a, "March 20 aṭang chuan DGP aṭanga a hniam ber thlengin ECI hnuaiah an awm tawh. June 6 thleng ECI hnuaiah an awm dawn," a ti.

ECI thuneihna hnuaia an awm chhungin state sorkarin an lakah thuneihna a nei lo tih sawiin Home Secretary chuan, "Discipline, transfer, etc. ECI thuneihna vek a ni tawh. Sorkar inthlahdah vanga vote thlak thei lo an ni lo," a ti a; sorkar inthlahdah vanga vote an thlak lo anga sawi an awm chu vanduaithlak a tih thu a sawi.

DGP Anil Shukla chuan, March 16, 2024-ah Lok Sabha inthlan atan notification chhuah a nih thu sawiin, "Mizoramah chuan inthlan hun atan April 19 ruat a ni. Ministry of Home Affairs (MHA) chuan Mizoram police-te hi an duty-na tura tih hmun March 28, 29 leh 30-ahte pan turin a rawn ti a ni," a ti.

Anil Shukla chuan, CEO hnenah postal ballot-a vote an thlak theih nan ngenna an thlen thu sawiin, "Mahse, technical issue a awm. Nomination withdraw hun a zawh hma chu postal ballot hmangin vote thlak theih a ni lo," a ti a; MHA order anga tirh chhuah an nih hnuah inhnuhdawh theih hun chhung a tàwp chauh thu a sawi.

Police-te'n vote an thlâk theih nan theihtawp an chhuahzui thu sawiin DGP chuan, "CEO kaltlangin ECI-ah ngenna thlen a ni. CEO lam pawhin kan police-te'n vote an thlak theih nan theihtawp an chhuah a, kan theihtawp tak meuh kan chhuah. Kan police-te'n vote an thlak thei lo hi pawi kan ti tak zet a ni," a ti.

Home Secretary leh DGP hi IGP Lalbiakthanga leh Home joint secretary Lalthiamsanga Sailo ten an ṭawiawm a ni.