Land Record Management System thar Land Revenue Minister-in a enfiah

Land Revenue and Settlement (LRS) minister B Lalchhanzova chuan nimin khan LRS department-in GIS Based Comprehensive Land Record Management System an buatsaih a enpui.

GIS Based Compre­hensive Land Record Management System hi North Eastern Council hnuaia din niin, cheng nuai 648 sênna tur a ni a; LRS department-a lehkha thehluhte chu online-a tih theih a nih tawh dawn bakah, application leh file-te pawh online-a buaipui theih a ni dawn. Software hi Lailen Consulting Limited siam a ni.

B Lalchhanzova chuan, system thar chuan awlsamna a thlen dawn tih sawiin, "Lehkha leh file bo ṭhin a tibo dawn a, hmasawnna ropui tak a ni. Surveyor detailment leh file thlen chin pawh mipuiin awlsam takin apps hmang leh SMS hmangin an en thei dawn a, department officer leh surveyor-te pawhin software hmang hian ram teh tawh chu an process thei dawn a ni," a ti.

Revenue Minister chuan, LRS department hnathawh chin an hotute leh mipui lamin an thlir zel theih tur thu sawiin, "Accountability leh trans­parency a thlen ngei ka beisei," a ti a; mipuiin document thehluh kim loh leh dilna felhlel a awmin system hmangin SMS leh link hmangin hriattir theih a nih dawn thu te, department leh mipui inkar a zìm sawt tur thute a sawi bawk.

LRS Minister hian Ainawn Veng chungchang pawh LRS department hotute a sawipui a; Chief Minister-in Government Complex ram chinfel chu a ngaih pawimawh thu sawiin, ram chinfel dan tur ruahmanna siam turin LRS department hotute chu a chah a ni.