Minister-in ṭhalai hlawhtlingte lawmpui

Minister C Lalsawivunga chuan nimin khan a bial, Aizawl South-I chhunga ṭhalai hlawhtlingte lawmpuina hun a buatsaih a; eng kawngah pawh rinawm a pawimawh thu a sawi.

Minister-in lawmpuina a hlante chu - MCS-a pakhatna Lalnunpuia Renthlei (Republic Veng), Book of the Year 2023 ziaktu K Vanlalhmangaihi (Republic Veng), HSLC 2024 topper Lalmoipuia Lawmzual (College Veng), Miss Mizoram 2024 Jennifer Lalrinzuali (Republic Veng) leh motor racing-a pakhatna Lalramdina te an ni a; thilpek a hlàn a ni.

C Lalsawivunga chuan, "Eng kawng pawh zawh ila, kan nun laipuiah rinawmna kan neih a pawimawh," a ti a; hlawhtlinna sang zawk chang tura ṭan la tur te, rinawmna vawng nung tlat tur te, nun thianglim lo leh a tlaran zawnga khawsa lo a, mi dang tana entawn tlak leh malsawmna ni turin a fuih.