Kolasib district-a ram neitute'n zangnadawmnaah NHIDCL an ngaichâng

Kolasib District Land Owners' Association (KDLOA) chuan Vairengte leh Sairang inkar kawng zauh tura zangnadawmna an dawn theih loh leh hnathawh kawnga harsatna awm chungchangah NHIDCL hmunpui thuchhuak an ngaichâng mek.

KDLOA hruaitute'n Vanglaini an hrilh danin, harsatna awm chungchangah Environment, Forest & Climate Change department bakah, Mizoram sorkarin a tih tur ang angte a ti tawh. Sorkar laipui hnuaia awm NHIDCL thuchhuak an ngaichàng mek a, Lok Sabha inthlan lai a nih avangin hmalak zung zung a harsa rih.

NH kawngpui zauh tura harsatna awm mek chungchang chu Ministry of Road Transport & Highways lam pawhin NHIDCL kutah an dah nia hriat a ni.

Vairengte-Sairang inkar kawngpui thlúr lia laih turah hian kum 2019 khan ram lak (land acquisition) a ni tawh a, ram neitute chuan an khawih thei tawh lo. Hetih lai hian zangnadawmna an la dawng lo thung.

KDLOA hian Mizoram sorkar leh EFCC department-in an harsatna tawhte an chinfelsak phûtin Lok Sabha inthlan kha boycott an tum a, mahse, beiseina an neih thar leh avangin an ṭhulh a ni.