SMART CITY – CITY BUS STAND

Kum nga vel kaltaah khan he thu hi ka lo ziak tawh a. Mahse, ka ziah chhan, Smart City-a City Bus Stand-a rei tak tak ding ṭhin chu a la pangngai reng si a. Tin, ka ziah hmasak ṭum khan, he thil vei ve in awm chuan Stand-a rei tak din laia Bus chhunga phun ru sep sep lo hian, Chanchinbu lamah rawn tlangau ve r'u ka ti a, mahse, Bus aṭanga kan chhuk hnu hian kan vei zui leh tawh lo emaw ni, tu mah bengchheng ve duh an awm tak lohah chuan tiin, mi tih duh loh ka'n ti lehpek a nih hi.

Tun ṭumah hian, he thu ka ziah hmain hemi chungchangah hian Aizawl City Bus Owner Association (ACBOA) President chu rei tak Phone-in ka bia a, thil awm dan ka zawt a ni. A sawi dan ka sawi hmain ka ziah hmasak ṭuma ka sawi dan tlangpui kha tlem han sawi leh ila.

1. Bus Stand-a mipuiin Bus lo nghah a, a lo thlen veleha chhuk tur an chhuk zawh a, a lut tur an luh zawha kal lehnghal mai hi eng nge a theih lohna?

2. Stand-a din veng veng hi tu thuneihna nge? Sawrkar, State Transport Authority nge - Aizawl Municipal Corporation nge - City Bus Owner Association?

3. Stand-a din veng veng hi Sawrkar leh mipui tan hlawkna leh ṭhatna a awm zawk em ni? Nge Bus lam hlawkna zawk?

4. State dang tih dan kan entawn nge - a ti awmchhun kan ni zawk?

5. Smart City-a City Bus Standa rei tak tak din hi a Smart kan ti em ni? Hnam dang leh ram dang mi hmuhah pawh a zahthlak deuh lo maw? tih vel a ni.

Hetia mawlmang taka han ngaihtuah pawha thil chiangsa reng chu, Bus-a chuang tur mipuite kha a ngai reng kan ni a, Bus lo thlen hma chu lo nghah a, a lo thlen veleha chuan kai a, kal lehnghal mai khan Bus tan hlohna tur a awm hmel der si lo va. A hnunga Bus lo kal tur kha Traffic jam-a a tan rei deuh leh mipuiin an lo nghak rei ve deuh dawn a ni mai a, tin, mi an lo tam bawk ang a, Bus tan hlawkna a ni dawn bawk si, a karah Bus dang an tlazep dawn der si lo va. Chubakah, stand-a Bus ding reng chhunga rei tak ṭhut ai chuan, Stand-a lo nghaktu zawk nih hi kan duh zawk ang. Kawng laka jam-a din chu tu m'a sawi theih a ni lo. Chu mai bakah, Stand-a rei tak tak Bus ding ṭhin hian Traffic flow a tibuai a, Aizawl Traffic jam a tam phah a ni.

Aw le, ACBOA President-in a sawi dan chuan, hetia Stand-a rei tak tak din ṭhin hi an lo duh bik reng reng lo a. Tun ang renga an kal chuan mipuiin innghahna tlakah an ngai lo tial tial ang a, kum rei lo teah an eizawnna hi a chhe dawn tih an hriat bakah, mipui mitmei an lo veng ve hle tih min hrilh a. Chuvangin, Driver-te pawh Stand-a ding rei lova tlan lehnghal zel turin an lo inhrilh ṭhin a, thu awih lo manchhuahte pawh an hrem ṭhin niin a sawi. Nimahsela, Driver leh Conductor-te chuan Bus neitu lam leh ram leh mipui lam ngai pawimawh miah lovin, vawiin, an ni khat hlawh tur leh hlep ruk tur ringawt ngaihtuahin Stand-ah a rei thei ang ber an ding lui ṭhin niin a sawi a, tin, chutiang check-tu tur Supervisor leh Asst. Supervisor te pawh an nei a, mahse, hmuh loh karah an lo ti leh tho ṭhin niin a sawi.

ACBOA hi Pawl chak tak leh khauh tak mai an ni a. Driver leh Conductor-te tana zawm tur Dan eng eng emaw siam ṭhin, Dan bawhchhiate chunga Action la zat zat ṭhin an ni. Driver leh Conductor ho hi inhek kual tawn tlang reng an ni bawk lehnghal. Chuti chunga Stand-a rei tak tak kan la ding fo tho si ṭhin hian ngaihtuah a tithui khawp mai. Bus neitute tel ve ngeina Bus service pawh hi an ding rei tho lo maw?

ACBOA President-in a sawi anga an inveng seng lo a niha, Driver leh Conductorte duham vang mai maia hetia mipui phun sup supna, ram leh hnam ang pawha zahthlak deuhroh hi, Sawrkar leh mipui leh Association lam hian tihtawp kan duh tak tak a nih chuan, chawplehchilh, ni khat thilthu-ah pawh kan titawp thei em em ang. Mipui tana awlsamna leh hmasawnna thil hi harsa lutuk leh huphurhawm lutukah kan ngai zel a, Gas Home delivery pawh kum rei tak kan practice ngam lo va, hei, tunah kan han ti a, kan ti a ni mai a, a lo theih reng si a. Nepolean-a khan 'Lei aṭanga Leihlawn dawh a, a nung chunga Vanram kai tih loh chu mihring tan tih theih loh a awm lo,' a lo ti a ni lo'm ni kha.

Association lam duty an indaih lo a nih pawhin, Bus-a mipui an luh zawh tawh hnua Stand-a la ding reng chu Traffic Police hian hamchhuak ṭhuai ṭhuai se la, thu awih lo chu hrem zel bawk rawh se. Police an awm lo a nih pawhin, mipui veivakte emaw, Bus chhunga chuang mipuite emaw hian chutiang Driver leh Conductor mawl sual â zual deuhte chu horn pek hmangin emaw i hau ngam ang u. An President hnenah, "Chuti chu thu awih lo Driver leh Conductor chu mipuiin kan rawn report ngam dawn tihna em ni?" tiin ka zawt a, ani chuan, "Tehreng mai, rawn report zel rawh u, kan vei ang min veipuia ka lawm khawp mai," a ti. Chuvangin, mipui lam hian tim lovin hma i la ang u. Anmahni kan hauh bakah, an din rei zawng nen lam emaw, a video nen lam emaw report hmiah zel ila, kan fel thuai mai ang.

Aizawl City Bus Owner Association duh dan kan hre tawh. Mipui lam kan huai lehzual theih nan Sawrkar hian Thupek mumal tak siam rawh se. Kha lehchen tih ena an lo en loh kha, Kalphung thar Sawrkar hian han ti teh se. Thu lian pui pui leh Project turu deuh deuh ringawt ni lo, hnaivai leh awlsam, ho te te anga langahte hian mipui thawvenna leh lawmnate hi a awm ve bawk a nia.

SMART CITY-ah CITY BUS, A STAND-a REI TAK TAK DING ṬHIN HI A SIMAT THLAWT LO VE!

- K. Hmingthankaia