Covid-19: Mizoram dinhmun Hripui vei 40 hmuh belh a ni

September 14-a ZMC laboratory-a Covid-19 positive hmuh chhuah mi 35-te chu mipa 21 leh hmeichhia 14, kum 10-65 inkar, Aizawl district-a mi vek an ni a, Mizoram chhunga kái chhâwng (local positive contact) vek an nia hriat niin, pakhat chu a kai ṭanna àwm hriat a ni rih lo.

Thawhṭanni khan LCH TrueNAT laboratory-ah hripui vei 131 Bn. BSF mi leh sa mipa pakhat hmuh chhuah a ni a, Uttar Pradesh aṭanga tun hnaia rawn lut, quarantine centre-a awm mek a ni. Hnahthial Hospital-ah pawh TrueNAT-PCR hmangin Covid-19 vei mipa pahnih hmuh chhuah a ni a, anni hi tun hnaia Assam aṭanga rawh lut, quarantine centre-a awm lai, harsatna nei lo ve ve an ni.

RAT hmanga endiknaah Sangau, Lawngtlai district-a mi, chanchinbumi leh MJA member mipa kum 38-a upa chuan Covid-19 a vei tih hmuh chhuah a ni a, ani pawh hi local positive contact niin, symptom a neih avangin State Referral Hospital lamah lak a ni. RAT hmang vekin Khawzawl district-ah mipa kum 30 mi, Uttar Pradesh aṭanga rawn lut hnam dang hmuh chhuah a ni bawk.

September 14 khan Mizoram pumah mi 1,306-te swab sample endik a ni a, chung zinga mi 995 (Aizawl district mi 993) chu ZMC-a endik an ni. TrueNAT-PCR hmangin mi 85 (Lungleiah 46, Siahaah 2, Champhaiah 6, Kolasib-ah 18, Hnahthialah 13) endik a ni a; RAT hmangin mi 226 (Aizawl 11, Lunglei 3, Champhai 4, Kolasib 179, Lawngtlai 9, Mamit 11, Khawzawl 9) endik a ni.



Share this Post

Login to comment
No Comments