State Disaster Management Authority (SDMA) hnuaia State Executive Committee chairman Lalnunmawia Chuaungo, chief secretary chuan nimin khan order tichhuakin, local task force (LTF) leh village task force (VTF)-te chu sorkar ruahmanna zâwm turin a chah.

SDMA chuan, Covid-19 léng karah Mizoram mipui eizawnna leh chêt velna kawnga hmalak dan turah, hun tawn ang zelin thupek leh inkaihhruaina chhuah ṭhin a nih thu a tarlang a, "September 1-30, 2020 chhunga inkaihhruaina kan zawm tur chu ni 31.8.2020 khan chhuah a ni. Hei hi Mizoram pum huapa zawm tura chhuah a ni," a ti.

Thupek leh inkaihhruainate chu tunlai Mizoram dinhmun thlir chunga uluk taka ngaihtuah hnua duan a nih thu tarlangin SDMA chuan, "Central sorkarin thupek a chhuah ai pawha khauh hret zawk zelin ruahmanna siam a ni. Sorkar hmalakna awmze nei taka tih hlawhtlinna atana task force-te inpekna leh thawhrimnate sorkar chuan a hlut tak zet," a ti a; task force, kohhran leh tlawmngai pawl hmalakna avangin Mizoramah Covid-19 vanga thi an la awm loh thu an tarlang.

SDMA thuchhuak chuan, Aizawla veng ṭhenkhat leh district ṭhenkhatah Mizoram sorkar thupek kalh zawng leh mipui ni tin khawsaknaa harsatna nasa tak thlen thei zawnga hmalakna a awm tih hriat a nih thu a tarlang a, "Sorkar hriatpui loa veng/khaw bil inkhàrkhipna thupek chhuah hriat tur a awm nual a, quarantine mekte in, páwn lam aṭanga tala-a kalh hnan thu hriat tur a awm zeuh zeuh bawk," a ti.

Veng ṭhenkhatah sorkar hnathawk, sorkarin duty tura a ruatte pawh duty thei loa task force ṭhenkhatin an siam thu tarlangin SDMA chuan, "Hei hi sorkar chuan pawi a ti hle a ni," a ti a, Covid-19 laka inveng chunga mipui nunphung khaihlak lutuk loa kal dan tur ruahmanna sorkarin a siamte zâwm turin task force-te an chah a ni.

SDMA tarlan danin, containment zone puang theitu chu The Mizoram Epidemic Diseases (Covid-19) Regulations, 2020-in thuneihna a pek, Chief Secretary leh DC-te an ni a; containment zone-a puan ngai a awm chuan Health & Family Welfare department hotute ráwnin risk assessment mumal tak siam hnuah chauh puan tur a ni. Ministry of Home Affairs chuan containment zone páwn lama lockdown puan a ngai a nih pawhin, state sorkarin central sorkar ráwn chungin a puang tur a ni tih a ni bawk.

Share this Post