Mipui ni tin mamawh kawlphetha

Power & Electricity Minister chuan department officer-te nena thil pawimawh an sawihonaah, kawlphetha hnianghnâr zawka mipui pek a nih theih nan theihtawp an chhuah zel tur thu sawi a; kawlphetha lama hmasawnna hna thawh avangin kawlphetha tihtawp zauh zauh a la ngai rih dawn thu pawh sawiin, mipui hriatthiamna a ngen.

PE Minister sawi danin, kawlphetha ṭha zawka mipui hnena pek a nih theihna tura lama hmasawnna hnathawh a sawi hi RDSS leh Smart City Project hmanga hnathawh a ni a, hna thawh tur aṭangin 33% vel chiah zawh a la nih avangin thawh tur a la tam a, chuvang chuan kawlphetha tihtawp a la ngai zauh zauh dawn a ni.

Kumin chhoah Aizawl leh hmun hrang hrangah mipuia kawlphetha pek a ṭhat tâwk loh cháng a awm fo a, hun eng emaw ti chhunga mipuiin power supply an hmuh ṭhat loh ber lai a ni hial mai theia sawite pawh a awm.

Power supply a ṭhat loh chhan Minister-in a sawi hi a dikin a rinawm a, pawm loh ngawt theih a ni lo. Mihring thunun phâk loh harsatna a thleng thei a, tun hnaiah pawh a thleng a; chu'ngte chu mipui pawhin hriatthiam a ṭul.

Mipuiin kawlphetha ṭha taka an hmuh theihna atana thawktu PE department-a thawkte leh enkawltu zawng zawngte thawhrimna a ropui. Mipui khawsak nawm zawk nan theihtawp chhuahin, a súr a sa hnuaiah rim takin, a cháng chuan nunna thàpin an thawk a, an fakawm tak zet. Ram leh mipui tan theihtawp chhuah zel se, mipui pawhin sawisel ringawta ramṭang loin, mahni theihna záwnah a remchan angin ṭawiàwm ṭhin ila, ram tan a hlu ngawt ang.

Sorkarna chelhtute leh PE department-a thawk zawng zawngte mar páta an ṭan zel a ngai dawn. Pumpelh theih loh harsatna a awm thei a, a awm fo tawh bawk. Chutiang karah chuan inthlahdah vanga kawlphetha awm lo leh mipuiin an tawrhna a thleng thei a; mipui tawrhna nasa zawk a thlen loh nan inthlahdah loh te, hnaa inpekna thûk zawk leh rinawm taka thawhte a ngai a ni.