CM leh ZPM-in Jeje-a'n Arjuna Award a phû an ti

Chief minister Zoramthanga chuan Twitter hmangin Union Sports Minister Kiren Rijiju hnenah Mizo footballer Jeje Lalpekhlua‘n Arjuna Award dawn a phu hle nia a hriat thu a  thawn.

ZPM party pawhin thuchhuah siamin, Jeje Lalpekhlua'n Arjuna Award dawn a phû hle an hriat thu leh, India hmarchhak mi leh Mizo a nih vanga dawng lo nia an ngaih thu an tarlang. 

CM chuan tun hnai khan Twitter-ah Kiren Rijiju hmuh turin thu a ziak a; Arjuna Award dawng tura Jeje Lalpekhlua hnawl a nih avangin hrehawm a tih thu leh hnâwl a nih avanga Mizote rilru natna chu a ṭâwmpui thu te, India rama football tihhmasawnna atana Mizo ṭhalaite thawh chu ropui a tih thute a tarlang.

ZPM party chuan, infiamna kawng hrang hranga Mizo ṭhalaite hmasawnna leh hlawhtlinna chu chhuanawm an tih thu sawiin, Mizo infiammite chu an kal zelna turah duhsakna an hlàn a, "Tun hnaiah Jeje Lalpekhlua chu National Sport Day-a chawimawina dawn phute zingah vawi tam tak a hming thlan a ni chunga chawimawina sang a dawng pha lo leh ṭhin hi ngaihthiam har kan ti tak zet a ni," an ti.

Mizoram Football Association chuan September 4 khan Union Sports Minister hi lehkha thawnin Arjuna Award dawng tura a vawi thumna atana Jeje-a hnawl a nih chhan hi an lo zawt tawh bawk a ni.



Share this Post

Login to comment
No Comments