RT-PCR atana sum sen a tlem, Test man tihto a ni thung - MPYCC

Mizoram Pradesh Youth Congress Committee (MPYCC) chuan, MNF sorkarin RT-PCR hmanga swab sample endikna atan sum an sèn tlem laiin, endik man an tito thung tih an sawi a, "Mimal damdawi-in hi Rapid Antigen Test (RAT) tal phalsak ve rawh se," an ti.

MPYCC hian nimin khan Aizawl Press Club-ah thuthar thehdarhtute an kâwm a; an president Dr Lalmalsawma Nghaka chuan, India ram leh ram dang ang bawkin Mizoramah Covid-19 a pung chho zel dawna a lan thu sawiin, "Mizoramah local council leh village council hun lo taka inthlan buatsaih a nih avangin nasa takin hri thehdarh zel a niin a lang," a ti.

Dr Lalmalsawma chuan, Covid-19 chungchanga Mizoram dinhmun dik tak hriat theih nan a tam thei ang ber sample test a pawimawhzia mithiamte'n an sawi ṭhin tih sawiin, "Hemi kalpui thei tur chuan mahni duh thua inenfiah 'voluntary testing' hi mi tin tan ban phâka kan siam a ngai," a ti a; Mizoramah swab test man a to avangin test duhte pawhin an tih theih loh phah thu a sawi.

Mizorama swab test man chu mimal laboratory-te ai pawhin a to thu sawiin Lalmalsawma chuan, "India ram hmun hrang hranga mimal laboratory-te kan be kual a, anni chuan an pualin RT-PCR leh TrueNat khawlte leiin, in luah man leh thawktute hlawh an pe vek chungin Mizoram aiin test man a la tláwm zawk. Mizoram sorkar hi a vannei hle, RT-PCR khawl hman mek pakhat donate, pakhat hawh a ni," a ti.

MPYCC President chuan, TrueNat khawlte pawh Mizoram sorkar lei a nih loh thu sawiin, "TrueNat khawlte hi mi tlawmngai leh ṭhahnemngaite'n CM Relief Fund an thawh khawm aṭanga lei vek a ni," a ti a; RAT test kit, PPE kit leh ZMC leh district hrang hranga Covid-19 do nan leh a veite enkawl nan pawh CMRF hman a nih thu a sawi. 

Dr Lalmalsawma sawi danin, Health department-in July 30, 2020-a thu an chhuaha a lan danin, Mizoram sorkar quarantine centre-a awmte subsidised rate-a swab test man chu RT-PCR hmangin Rs. 2,500 leh TrueNat hmangin Rs. 1,500 a ni a; mahni thua test (voluntary) atan chuan RTPCR-ah Rs. 4,500 leh TrueNat-ah Rs. 3,000 a ni thung.

RT-PCR test-a bawlhlo mamawhte chu, virus transport media leh RT-PCR test kit (with extractor)-te a ni. Private laboratory-te purchase rate an zawhnaah, virus transport media chu chawhrualin Rs. 200 man leh RT-PCR test kit (with RNA extractor) chu chawhrualin Rs. 700 man a nih thu an lo hrilh. Private laboratory-te tan RT-PCR hmanga mi pakhat endik nan chawhrualin Rs. 1,500 (sample latute PPE man tiamin) aiin a hniam zawk a ni.

MPYCC President chuan, Mizoram sorkar chu ICMR-in RT-PCR test kit a thlàwna a pek thu sawiin, "Hetiang a nih laiin mimal laboratory-ah chuan RT-PCR test man hi Rs. 2,500 aiin a hniam a, heti chung hian hlêp an la neih thei. Mizoram sorkar hi test rate tihniam turin kan phût. Chuti lo chu, Mizoram sorkarin a va ti ṭha em ti loin, a va sumdawng thiam em, an la ti ang," a ti.

India ram hmun hrang hrangah mimal leh kohhran damdawi-inah RAT hmangin Covid-19 veia rinhlelhte endik theih a nih thu sawiin Dr Lalmalsawma chuan, "Assam-ah chuan RAT test kit mimal damdawi-inte a thlâwnin a pe a, Mizoramah chuan mimal damdawi-in neitute'n test kit man chawia endik an inhuam a ni," a ti a; mimal leh kohhran damdawi-inte chuan RAT hmanga swab test tih phalna sorkarah an dil tawh tih a sawi bawk.




Share this Post

Login to comment
No Comments