Bungrua a rawn lut leh lo RAT-a endik loh an phut

Silchar Truck Driver Association (STDA)-te'n an member Covid-19 vei enkawl dam tawh mi 72-te chhuah an nih hunah Mizorama lut tur bungraw phur lirtheite an dan tihtawp intiam mah se, he thu ziah lai thleng hian lirthei an la dang. STDA-te hian Rapid Antigen Test (RAT) hmanga endik loh an phût.

STDA-te hian an member CCC-a awm mekte chhuah phutin September 12 aṭang khan Lailapur-ah bungraw phur lirthei an dang ṭan a ni. An member-te chhuah vek phût mah se, district administration lamin mipui himna ngaihtuah avangin an remti lo. STDA chuan an member Covid-19 vei tawh lo tal chhuah an nih chuan lirthei dan an tihtawp tur thu an sawi a ni.

Thingdawl CCC-a hnamdang driver 72-te chu Thawhṭanni khan chhuah an ni a, zan dar 7 velah Lailapur thlenpui an ni a; nimahsela an lungawi loh chhan Mizoram sorkar hnena an ziah lana tel lo an phût belh leh a ni.

Vairengte SDO (Civil) hnen aṭanga thudawn danin, STDA-te hian thil chi hrang hrang phût belhin, chung zingah chuan Mizorama an rawn luh dawna RAT hmanga endik tawh loh pawh a tel.



Share this Post

Login to comment
No Comments