Health Secretary-in Covid-19 a vei

Health & Family Welfare secretary H Lalengmawia'n Covid-19 a vei tih, September 14, Thawhṭanni zan khan Zoram Medical College (ZMC) laboratory-a RT-PCR hmanga endiknaah hmuh chhuah a ni.

Vanglaini palai zawhna chhangin H Lalengmawia chuan, Covid-19 a vei avangin harsatna a neih loh thu a sawi a, "Covid-19 ka vei hnu leh vei hmain ka tak­saah danglamna a awm lo. Symp­tom pawh ka nei lo," tiin, ngaih­tuahawm a nih loh thu a sawi.

Health Secretary chuan, Covid-19 avangin indona hmuna awm an nih thu sawiin, "Hripui doa a hmatáwnga ṭang tam takin hripui an vei tawh a, a hminga hotu nih vanga him reng theih a ni bik lo," a ti.

H Lalengmawia sawi danin, September 14, Thawhṭanni khan a pisaah meeting a awm reng ṭhin avang leh dâwrtu a neih reng ṭhin avangin a staff-te'n swab sample endik turin ruahmanna an lo siam a, an endiktir ta a ni. A pisaa thawk zinga mi dang pathumin Covid-19 an vei bawk.



Share this Post

Login to comment
No Comments