CBSE-in result a tichhuak Mizorama sikulte result a ṭha
Central Board of School Education (CBSE) chuan nimin khan pawl 10 leh 12 result a tichhuak a; Mizoram aṭanga CBSE zawmtu Kendriya Vidhyalaya, Ṭhuampuia zirlaite an pass vek a, Mizoram Institute of Comprehensive Education (MICE) pawhin result an nei ṭha thawkhat.
MICE hotute hnen aṭanga thu dawn danin, CBSE pawl 10-ah exam hmachhawntu zirlai 18 an pass vek a, distinction-ah mi pahnih an pass. Pawl 12 Arts-ah exam hmachhawntu zirlai 56-te pass vekin, distinction-ah zirlai 24 an pass a; Science-ah zirlai exam 53 zinga 45 pass in, pakhat a fail a, zirlai pasarihin compartmental chance an nei.
MICE principal Lalrinkima chuan, academic session 2024-25 atan May 14-21, 2024 chhungin admission tih hun an hawng dawn tih a sawi.
Kendriya Vidhyalaya, Ṭhuampuiah pawl 10 zirlai exam hmachhawntu 55-te an pass vek a; pawl 12-ah Arts zirlai 33 leh Science zirlai 31, an vaiin zirlai exam hmachhawntu mi 64-te an pass vek bawk.