Synod Hospital-a damlo 863-te awm man Rs 2,18,04,753 peksak

Mizoram Presbyterian Kohhran hnuaia damdawi-in, Synod Hospital-ah financial year liam ta chhungin damlo awm man pe thei lo mi 863-te tan Charity Fund aṭangin Rs 2,18,04,753 peksak a ni.

Synod Hospital Board chu May 7, 2024 khan Synod moderator kaihhruaiin an ṭhukhawm a; Synod Hospital director Dr Lalṭhakima, Synod Hospital Board secretary ni bawk chuan, sorkar kum kal ta chhung khan damlo awm man pe thei lo mi 863-te tan Charity Fund aṭangin Rs 2,18,04,753 peksak a nih thu a tarlang.

Synod Hospital-ah hian April 2024 chhung khan mi 1,049 admit an ni a, nau piang 128 awmin, mitthi 25 an awm. Synod Hospital OPD leh Dr Fraser's Clinic, Mission Vengah mi 6,292 an inentir.

Mizoram Synod hnuaia damdawi-in dang, John Williams Hospital, Lungleiah January-April 2024 chhungin OPD-ah mi 1,969 an inentir a, damlo 357 admit a ni a, nau dama piang 72 leh mitthi pahnih an awm a ni.