MIS officer tharte'n Champhai an tlawh

Mizoram Information Service (MIS) officer tharte chuan District Office Orientation Programme hnuaiah nimin khan Champhai district an tlawh a, Champhai district-a sorkar hotute leh thuthar thehdarhtute nen an inkâwm.

MIS officer thar pangate hian Champhai SP mawhphurhna la mektu additional SP Lalmalsawma Hnamte leh DRDO project director Lalrinawma te an pisaah an kâwm a, IPR conference hall-ah thuthar thehdarhtute nen an inkâwm leh bawk.

Champhai additional SP Lalmalsawma Hnamte chuan MIS officer tharte chu Champhai district-a police-te hmalakna leh venhimna kaihhnawih thil pawimawhte a hrilhfiah a; DRDO Project Director-in hi DRDO kalphung, thingtlang hmasawnna tura rural development scheme hrang hrang - MGNREGA, PMAY-Gramin leh PMKSY kalpui dante a hrilhfiah thung.

IPR conference hall-a thuthar thehdarhtute nen an inkawmnaah Dr Lallawmkima, IPRO chuan, Information & Public Relations department leh MJA Champhai district-te'n sorkar thuchhuah, mipui hriat tur puanzar kawngah thawhhona ṭha tak an neih thu a sawi a; Champhai district MJA president Lalhlupuia, secretary R Lalfakawma leh MIS officer tharte aiawhin Biaknungi ten thu an sawi bawk. MIS tharte leh MJA member-te'n zanriah an kîlho nghal a ni.

MIS 2024 batch mi panga - F Lalrinfela, F Zodingpuii, Biaknungi, Lalzara leh N Vahneichhi te hian District Office Orientation Programme hnuaiah May 10, 2024 thleng Champhai district-ah training an nei dawn. A hmain Kolasib district-ah hun an hmang tawh a, ruahman dan chuan tun thla tawp lamah Lunglei district an tlawh leh ang.