PCI Biennial General Assembly a ṭiak; Hmeichhia nemngheh an pawm rih lo

Presbyterian Church of India (PCI) Biennial General Assembly vawi 45-na, May 2, 2024-a Chaltlang Kohhran biak-ina ṭan chu nizan khan a ṭiak. Inkhawmpuiah hmeichhiate pastor/minister atana nemngheh rawtna chu a pawm rih lo.

PCI General Assembly-ah hian May 3-4 chhung khan chhûn lamah moderator Rev. Joshua Jeme kaihhruaiin rorel a ni a; PCI Executive Committee aṭanga thu lut, hmeichhiate pastor/minister atana nemngheh rawtna chu sawihoin, "Executive Committee-in lo zir chiang lehin, chak zawkin hma la se la, Biennial General Assembly neih leh hunah ngaihtuahho leh ni se," an ti.

An rorel dang zingah, kum 2024-2026 chhunga PCI administrative secretary atana Aizawl Theological College-a zirtirtu ni mek Rev. Dr B Lalnunzira ruat te, KJP Pdeng provisional synod chu synod puitlinga dah te, minister-te clerical collar pawimawhna tihchiante a tel.

Nimin khan chawhma inkhawmah Lalpa Zanriah Sakramen ṭheh a ni a, zanah PCI moderator kal chhuak Rev. BB Lamin-a'n thuchah a sawi.

PCI Biennial General Assembly-ah hian thupui chu 'Thy Kingdom Come' (I ram lo thleng rawh se) tih a ni a; rorelnaah palai 1,537 leh visitor 35 an tel. Kum 2026-a PCI General Assembly puipa tura thlan zingah Mizoram Synod aṭangin Rev. Dr PR Hmuaka telin, statistician atan ruat a ni a, ATC-a thawk mek a ni. Tun ṭuma inkhawmpui hi Mizorama nghah vawi 10-na a ni.