MPSC hna lâk dan chhuitu Manzuala'n thil dik lo a hmu lo
MCS (Combined Competitive) Examination 2023-ah dik lo a awm nia sawi a nih avanga MPSC chhui tura sorkarin a ruat inquiry officer M Lalmanzuala, IAS (Rtd) chuan MPSC-in hna lâkna a kalpui danah dik lo a hmu lo.
Chief minister Lalduhoma'n nimina thuthar thehdarhtute a kawmnaah zawhna chhángin, MPSC hna lâk dan chhuitu M Lalmanzuala'n thil dik lo a hmuh loh thu leh a report thehluh chu an pawm thu a sawi.
CM Lalduhoma chuan, M Lalmanzuala chu an mi rin em em a nih thu sawiin, "Chuvang chuan a kutah kan dah. Inquiry a ti uluk viau a, a report pawh a thui khawp mai. Thil fel lo engmah a awm lo tih kha a finding a ni," a ti.
Sorkarin a tih zui zel dan tur zawhna chhángin Lalduhoma chuan, "Kan chhui chiantir tawh a, a bak han chhui chiantir leh tur a awm ka hre lo. Chuvangin, Pu Manzuala report kha kan pawmsak tawh. Inquiry Officer berin inquiry a laknaah thil fel lo a hmuh loh chuan chhui leh mah ila hmuh chhuah tur dang a awm chuang lo a ni," a ti a; IO-in mi hrang hrang kâwmin an statement a la a, a tih theih zawng zawng a tih thu a sawi.
Lalduhoma chuan, IO-in chhânna lehkha (answer script)-a an mark pek an nawh reh tâk leh mark pekna tur dik tak zawk designated slip-a mark pek a en kawp (compare) tih sawiin, tihdanglam a awm lo tih a hmuh chhuah thu a sawi a ni.
Chief Minister chuan, IO hmuh chhuah dan chuan, answer script-a mark pek, correcting fluid hmanga nawh reh awm ṭhin chu kum 10 chuang an lo kalpui tawh a nih thu sawiin, "Answer script-a mark pek leh mark pekna tur slip dik zawka mi a inmil tih a hriat theih dan hriat ka duh a, ka zawh nawntir leh," a ti a; IO chuan an nawh reh tawh chu ngun taka en chuan a la hmuh/hriat theih tih a tarlan thu a sawi.
Kum 10 chuang an lo kalpui tawh, answer script-a mark pek leh an nawh reh dan chu hun kal zel turah chuan rintlak a ni lo tih an hre tawh tih sawiin CM chuan, "A chawh reh dan dang ngaihtuah chhuah tur a ni kan ti. Tunlai technology-ah chuan tih dan a awmin ka ring," a ti.
Lalduhoma chuan, answer script-a mark pek chu dan lo a nih thu sawiin, "Mark pek tur a ni lo. Answer paper hi an roll number leh tu nge a nih hriat miah lohin code pek vek a ni a, tu chhànna nge ka endik tih a endiktuin a hre lo," a ti a; chuti chung chuan MCS Combined Competitive Examination 2023-ah subject 11-ah answer sheet-ah mark pek a awm a, chu chu an chawk reh an tih chu a nih thu a sawi.
Chief Minister chuan, MPSC tihchangtlun dan tur an ngaihtuah mek thu sawiin, "An office building saw an indaih lo deuh a, tih belh dan kan ngaihtuah mek. Manpower kan tih belh nasa a, MSSSB-a thawk ṭhin eng emaw zat MPSC-ah kan behtir a, 4th grade aṭanga officer lian thlengin. Examination Wing kan tiphuisui. Tun hma ai chuan an indaih tawh. Tunah chuan kan thuam ṭha thawkhat viau," a ti.
Examination schedule mumal tak siamin, awmze nei takin calendar siam a nih thu Chief Minister chuan a sawi bawk.