MNF leh Congress party MDC-te'n LADC-ah sorkar inṭawm siam an tum

Lawngtlai DC enkawlna hnuaia awm mek Lai Autonomous District Council (LADC)-ah MNF leh Congress party aṭanga member of district council (MDC)-te'n sorkar an siam thei dawn.

Thu dawn danin, MNF party aṭanga MDC 12-te leh Congress party MDC pakhatte'n United Legislature Party an din a, ULP angin LADC-ah sorkar an siam theih thu nimin khan Lawngtlai DC hnenah an thlen a ni.

ULP-ah hian Congress MDC awm chhun C Lalmuanthanga chu leader niin, chief executive member (CEM) a ni dawn a, deputy leader atan MNF MDC MC Sanghuliana thlan a ni. Treasurer atan MNF member Lalropuia Chinzah leh secretary atan MNF member H Lalmuansanga te thlan an ni bawk.

LADC-a sorkar siam theih chungchangah hian MNF adviser Robert Romawia Royte chuan, "MNF chuan sorkar siam leh ngei tumin plan A, B leh C thlengin kan nei. MNF hlangin sorkar siam thei lo mah ila, Congress party-te nen sorkarna lungrual taka kan siam thei tur hi a lawmawm tak zet a ni," a ti.

LADC-ah hian sorkar rin tâwk lohna motion a luh avangin CEM V Zirsanga kaihhruai sorkar chu March 7, 2024 khan bûk tum a ni a, mahse, bûk a nih hmain CEM aṭanga bànna a thehlut. V Zirsanga hi eirûk thubuaiah court-in thiam loh a chantir avangin MDC ṭhenkhatin báng turin an phût a ni.

LADC-ah hian MDC 25 an awm a, MDC pakhat Dr Lorrain Lalpekliana Chinzah chuan MLA a nih tawh avangin MDC aṭanga bànna a thehlut a, MDC 24 an awm mek. MNF hian an MDC pasarihin an chhuahsan avangin MDC 12 an nei mek a, MNF aṭanga chhuak tate leh Congress leh ZPM thláwptu MDC-te lam, Lairam Democratic Progressive Alliance (LDPA)-ah MDC 12 chiah an awm bawk a, sorkar siam turin MDC 13 neih a ngaih avangin sorkar siam thei an awm lo.

Hei vang hian Governor chuan LADC thuneihna chhuhsakin, Lawngtlai DC chu LADC enkawl turin a ruat ta a ni.