MUP-in VC/LC term kum 3 ni se an duh

Mizoram Upa Pawl (MUP) chuan nimin khan Vanapa Hall-ah General Assembly vawi 49-na an hmang a; village council leh local council hun chhung (term) kum 5 ni mek chu kum 3 ni turin sorkarah thlen an rêl.

MUP General Assembly hi chaw­hmaah an president Nghak­lianmawia'n a kaihruai a; khuallian Dr Lalhriatzuali Ralte, Social Welfare director chuan, sorkarin kum upate tana scheme hrang hrang a neihte bakah, MUP-te'n recreation centre an neih theihna tur leh upate hamṭhatna tur buaipui mek a nih thu a sawi.

Chawhnuah vice president Lalbiak­mawia Khiangte kaihhruaiin ro an rél a, 'Local council/village council term hi kum 5 ni loin kum 3 ni turin sorkarah thlen ni rawh se,' tiin an rél a; kum 2024-25 budget atan cheng nuai 83 an pawm.

MUP Assembly chuan, Old Age Pension bik hmu tur leh thlâkna tur buatsaih chungchangah MUP branch-te hi sorkarin ngai pawimawh lehzual se, an ti a; Mizoramah tlawmngaihna tlahniam tur vên nan MUP-te'n hma la se an tih bakah, tun aia chak zawkin nungcha humhalh kawngah sorkarin hma la se, an ti bawk.

MUP chuan, Mizoram sorkarin Old Age Pension atana state sorkarin thla tin Rs 100 a tum ve ṭhin chu kumin financial year aṭanga Rs 1,000-ah tihpun mek a nih avangin lawmawm an tih thu leh, Zemabawka MUP ramah cheng nuai 290 man MUP building sak a nih dawn avangin lawmawm an tih thu an tarlang a ni.