Assam : Karbi Anglong-a kangmei chhuakin chenna in 40 chuang tichhia

Assam leh Nagaland inrina bul, Borlengri, Karbi Anglong district-ah Pathianni tlai lam khan kangmei nasa tak chhuak avangin chenna in 40 chuang a kangral. Heng in kangte hi a tam zawk di hmanga sak niin kangmei pawh hi ṭhelh theih loh khawpa chakin a kang nasa a ni.

Kangmei chhuak avang hian thi leh hliam an awm lo nia tarlan a ni. Kangmei hi tlai lam dar 1-a chhuak niin, in te chu di hmanga sak a nih vangin kangmei hi a inla kai chak hle. Hei bakah hian gas cylinder puak leh thil thawin kangmei hi ṭhelh mih a tihar hle bawk. Chenna in 40 chuang zet a kan avangin chhungkaw 50 vel chu chenna nei loin an awm mek a ni.

West Fire Station, Dimapur chuan kangmei a chhuak tih an hriat veleh kangṭhelh motor pahnih an tir nghal a, tlai dar 3 velah kangmei hi an ṭhelh mit thei a ni. Kangmei chhuah chhan hi hriat a ni lo a, kangṭhelhtute leh police lam chuan kangmeiin a tihchhiat hlut zawng hi an la sawi mai thei lo bawk.