Vanglaini - RUSA aiah EQUIP kalpui tum a ni

KHAWTHLIR

Ramri vengtu zinga mi a thi

C Lalṭanpuia (46) s/o C Sualneka, Champhai Vengthlang chu August 12, Nilaini zan dar 7 khan rannung seh natna (scrub typhus) vangin a thi a, nimin khan vui a ni. A nupui H Lalnuntluangi leh an fate pali a kalsan. Thu dawn danin, C Lalṭanpuia hi Champhai Vengthlang YMA president a ni a; Covid-19 laka invênna atana ramri vennaah hun eng emaw chen a riak lut ve a, chuta ṭang chuan a thihpui tak rannung natna hi a kái a ni.

SRH-ah mi 59

State Referral Hospital-ah Covid-19 vei mi 59 enkawl mek a ni a, niminah dah luh thar an awm lo. Mi 59 zinga pakhat chu ICU-ah la awm zelin, ṭhat lam a pan a, Isolation Ward-a awm mi 55 zingah khawsik sang vak lo nei pahnih an awm a, ngaihtuahawm an ni lo. SICU-ah mi pathum an awm bawk.

1,717 khung hrang

August 12, 2020 thleng khan Mizoram hmun hrang hranga quarantine facility-ah khung hran mi 1,717 an la awm. Khung hrante chu Aizawl district-ah mi 853, Lungleiah 159, Siaha-ah 44, Champhaiah 42, Kolasib-ah 344, Serchhipah 91 Lawngtlaiah 89, Mamitah 54, Saitualah 17, Khawzawlah pakua leh Hnahthial district-ah mi pakhat an la awm a ni.

Antigen Test-in endik

Champhai Chief Medical Officer office chuan DC thupek bawhzuiin nimin khan frontline worker, sumdawng leh muṭia/porter-te'n Covid-19 an vei leh vei lo Rapid Antigen Test hmangin an endik a, hripui vei hmuh chhuah a ni lo. Champhaiah hian Rapid Antigen Test hi July 22, 2020-ah hman ṭan a ni a, mi 150 endik tawhin, Covid-19 vei mi pali hmuh chhuah tawh a ni.

Thisen pe

KṬP, Bethlehem Venglai Branch chuan nimin khan thisen pek rûnpui an huaihawt a, Aizawl Civil Hospital tan thisen unit 53 an pe a, a petute mipa 43 leh hmeichhia 10 an ni.

Sorkar chawlh

GAD chuan nimin khan notification tichhuakin, village council leh local council inthlan ní - August 27, 2020 chu inthlanna tur district-ah sorkar chawlh atan puan a ni tih a tarlang. Chawlh puan hi mipuite'n vote an thlak ṭheuh theihna atana tih a ni a; inthlanna tur - Aizawl, Lunglei, Champhai, Kolasib, Serchhip, Mamit, Saitual, Khawzawl leh Hnahthial district-te a huam a ni.

DAWNTISEI

RUSA aiah EQUIP kalpui tum a ni

Ministry of Human Resource Development (MHRD) hnuaia college tihhmasawnna tura kalpui mek, Rashtriya Uchchatar Shiksha Abhiyan (RUSA) chu tihtàwp a, a thlâkna atan Educational Quality Upgradation & Improvement programme (EQUIP) hman tumna a awm a, thu chiang erawh hriat a la ni lo.

RUSA hotute sawi danin, EQUIP hi MHRD-in higher education tihhmasawnna tura a din tur a ni a; zirna-in ṭha sa tan leh zirna-in chhawmdawl ngai deuhte tan a hranga hmalakna tur niin, booklet pawh tihchhuah a ni tawh. EQUIP hman tum thu hi Mizoram RUSA chuan kum 2019 tàwp lamah an hria a, Covid 19 vangin hmalakna thar a awm thei loah an ngai thung.

Tuna RUSA-2 kalpui mek hi March 2021-a zo tur a ni a, 15th Finance Commission rawtna anga kalpui theih a nih loh avangin kum khat chhung atan sorkar laipuiin an pawtsei leh a ni.

RUSA-2 kal mekah hian Mizorama college 15 tan 'Infrastructure grant to college' atan cheng nuai 200 ṭheuh pek a ni a; Mamit College, Saiha College, Hnahthial College leh J Thankima College-te tan cheng nuai 400 ṭheuh hmangin hmasawnna tur chi hrang hrang kalpui mek a ni a, sum hi a tahtawlin MHRD-in a rawn pe a ni.

Share this Post

Login to comment

No Comments